വാഷിങ്ടണ്‍: ഇസ്്‌ലാമിനെയോ ത്യാഗത്തെയോ കുറിച്ച് അമേരിക്കന്‍ പ്രസിഡന്റ് സ്ഥാനാര്‍ഥി ഡൊണാള്‍ഡ് ട്രംപിന് ഒന്നുമറിയില്ലെന്ന് ഇറാഖില്‍ കൊല്ലപ്പെട്ട മുസ്‌ലിം സൈനികന്റെ മാതാവ്. ഡെമോക്രാറ്റിക് പാര്‍ട്ടി കണ്‍വന്‍ഷനില്‍  കൊല്ലപ്പെട്ട സൈനികന്‍ ഹുമയൂണിന്റെ പിതാവ് ഖിസ്്ര്‍ ഖാന്‍ ട്രംപിനെതിരേ പ്രതികരിച്ചിരുന്നു. ഇതിനു മറുപടിയുമായി തന്നെ അധിക്ഷേപിച്ച് ട്രംപ് നടത്തിയ പ്രസ്താവനയോട് പ്രതികരിക്കുകയായിരുന്നു സൈനികന്റെ മാതാവ് ഗസാലാ ഖാന്‍.

താന്‍ സ്വര്‍ണമെഡല്‍ ജേതാവിന്റെ മാതാവാണ്. ട്രംപിന് തന്റെ വേദന മനസിലാകില്ലെങ്കിലും ലോകത്തിന് മനസിലാകും. വാഷിങ്ടണ്‍ പോസ്റ്റില്‍ എഴുതിയ ലേഖനത്തിലാണ് ട്രംപിന് ഇസ്്‌ലാമിനെ കുറിച്ചും ത്യാഗത്തെ കുറിച്ചും ഒന്നും അറിയില്ലെന്ന് ഗസാല പറഞ്ഞത്. ത്യാഗമെന്തെന്ന് ട്രംപ് പഠിക്കണം. മരിച്ചുപോയ എന്റെ മകന്റെ വലിയ ചിത്രത്തിന് മുന്നില്‍ എനിക്ക് എങ്ങനെയാണ് സ്വയം നിയന്ത്രിക്കാനാവുക. കണ്‍വന്‍ഷന്‍ വേദിയില്‍ അങ്ങനെയൊരു അവസ്ഥയില്‍ ഏത് മാതാവിനാണ് അത് കഴിയുക. ട്രംപിനും മക്കളുണ്ടല്ലോ. ശരിക്കും ഞാന്‍ എന്തുകൊണ്ട് സംസാരിച്ചില്ലെന്ന കാര്യത്തില്‍ ഇത്ര അത്ഭുതപ്പെടാനെന്തിരിക്കുന്നു.

ഇസ്്‌ലാമിനെ കുറിച്ച് സംസാരിക്കുമ്പോള്‍ ട്രംപിന്റെ അജ്ഞതയാണ് വെളിവാകുന്നത്. യഥാര്‍ഥ ഇസ്്‌ലാമിനെയും ഖുര്‍ആനെയും പഠിക്കാന്‍ അയാള്‍ തയാറായിരുന്നെങ്കില്‍ ഈ ധാരണ മാറിയേനെ. ഭീകരവാദം മറ്റൊരു മതമാണെന്നുപോലും ട്രംപിന് മനസിലാക്കാനാകുന്നില്ല.