സന്‍ആ: ആഭ്യന്തര യുദ്ധം നടക്കുന്ന യമനിലെ പുരാതന സൂഫി മസ്ജിദ് സലഫികള്‍ പൊളിച്ചു. 16-ാം നൂറ്റാണ്ടില്‍ ഒരു സൂഫി പണ്ഡിതന്റെ സ്മരണാര്‍ഥം നിര്‍മിച്ച അതിപുരാതന മസ്ജിദാണ് കഴിഞ്ഞ ദിവസം സലഫി അനുകൂല സംഘടനാ നേതാക്കള്‍ പൊളിച്ചത്.

യമനിലെ പുരാതന നഗരിയായ തായിസിലെ മസ്ജിദാണ് പൊളിച്ചുനീക്കിയത്. പ്രാദേശിക സലഫി ഗ്രൂപ്പുകളുടെ നേതാവായ അബു അല്‍ അബ്ബാസിന്റെ നേതൃത്വത്തിലാണ്  ശൈഖ് അബ്ദുല്‍ ഹാദി അല്‍ സുദിയെന്ന പണ്ഡിതന്റെ സ്മരാണര്‍ഥം നിര്‍മിച്ച മസ്ജിദ് തകര്‍ത്തത്.

തായിസിലെ പുരാതന ചരിത്രശേഷിപ്പ് തകര്‍ത്തതിനെതിരേ യമന്‍ പുരാവസ്തു വകുപ്പും മ്യൂസിയം അതോറിറ്റിയും അപലപിക്കുകയും കടുത്ത പ്രതിഷേധം രേഖപ്പെടുത്തുകയും ചെയ്തു.
യമനിലെ ഏറ്റവും ആദരിക്കപ്പെടുന്ന ഒരു ചരിത്ര സ്മാരകം കൂടിയായിരുന്നു ഇതെന്ന് ചരിത്ര സൂക്ഷിപ്പു വകുപ്പ് പറഞ്ഞു.