കോഴിക്കോട്: ദക്ഷിണ കന്നടയിലും ഉത്തര മലബാറിലും സമസ്തയെ ശക്തിപ്പെടുത്താന്‍ കഠിനമായി പരിശ്രമിച്ച പണ്ഡിതനായിരുന്നു എം.എ ഖാസിം മുസ്‌ലിയാരെന്ന് സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ അനുസ്മരിച്ചു. വലിയ ശിഷ്യ സമ്പത്തിന്റെ ഉടമ കൂടിയായ അദ്ദേഹത്തിന്റെ പ്രയത്‌നഫലമായി സമസ്തക്കും കീഴ്ഘടകങ്ങള്‍ക്കും വലിയ മുന്നേറ്റങ്ങള്‍ ഉണ്ടാക്കാന്‍ സാധിച്ചിട്ടുണ്ടെന്നും തങ്ങള്‍ അനുസ്മരിച്ചു. 

സമസ്തയിലും വിവിധ വിദ്യാഭ്യാസ സാമൂഹിക രംഗങ്ങളിലും കര്‍മനിരതനായ ഖാസിം മുസ്‌ലിയാരുടെ വിയോഗം സമസ്ത കുടുബത്തിന് വലിയ നഷ്ടമാണെന്ന് സമസ്ത ജന. സെക്രട്ടറി കെ. ആലിക്കുട്ടി മുസ്‌ലിയാര്‍ അനുസ്മരണ സന്ദേശത്തില്‍ പറഞ്ഞു. 

ജീവിതാന്ത്യം വരെ കര്‍മരംഗത്ത് സജീവമായിരുന്ന അദ്ദേഹം നിഷ്‌കളങ്ക ജീവിതത്തിന്റെ പ്രതീകം കൂടിയായിരുന്നു. സമസ്തയുടെ പ്രവര്‍ത്തനങ്ങള്‍ കര്‍ണാടകയിലും കാസര്‍കോട്ടും വ്യാപിപ്പിക്കാന്‍ അദ്ദേഹം നടത്തിയ സേവനങ്ങള്‍ മഹത്തരമാണെന്നും ആലിക്കുട്ടി മുസ്‌ലിയാര്‍ പറഞ്ഞു.

വിദ്യാഭ്യാസരംഗത്തെ കര്‍മോത്സുകനായ പ്രവര്‍ത്തകനെയാണ് ഖാസിം മുസ്‌ലിയാരുടെ വിയോഗത്തിലൂടെ നഷ്ടമായതെന്ന് സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡ് പ്രസിഡന്റ് പി.കെ.പി അബ്ദുസ്സലാം മുസ്‌ലിയാര്‍, ജന.സെക്രട്ടറി എം.ടി അബ്ദുല്ല മുസ്‌ലിയാര്‍ എന്നിവര്‍ അനുസ്മരണ സന്ദേശത്തില്‍ പറഞ്ഞു. ഉത്തരകേരളത്തിലും കര്‍ണാടകയിലും വിദ്യാഭ്യാസ രംഗത്ത് വന്‍മുന്നേറ്റം ഉണ്ടാക്കാന്‍ അദ്ദേഹത്തിന്റെ പ്രവര്‍ത്തനത്തിലൂടെ സാധിച്ചുവെന്നും അവര്‍ പറഞ്ഞു.