വടകര: സി.പി.എം കോഴിക്കോട് മുന്‍ ജില്ലാ സെക്രട്ടറിയും സംസ്ഥാന കമ്മിറ്റി അംഗവുമായിരുന്ന എം.കേളപ്പന്‍ (എം.കെ പണിക്കോട്ടി, 92) അന്തരിച്ചു. ഇന്നലെ പുലര്‍ച്ചെ രണ്ടോടെ വടകര സഹകരണ ആശുപത്രിയിലായിരുന്നു അന്ത്യം. 

വടക്കന്‍പാട്ട് കലാകാരനും എഴുത്തുകാരനുമായിരുന്നു. ദീര്‍ഘകാലം സി.പി.എം സംസ്ഥാന കമ്മിറ്റി അംഗവും 11 വര്‍ഷം കോഴിക്കോട് ജില്ലാ സെക്രട്ടറിയുമായിരുന്നു. അവിഭക്ത കമ്മ്യൂണിസ്റ്റ് പാര്‍ട്ടി വടകര മണ്ഡലം കമ്മിറ്റി അംഗം, സി.പി.എം കുന്നുമ്മല്‍, വടകര ഏരിയാ സെക്രട്ടറി, കര്‍ഷകത്തൊഴിലാളി യൂനിയന്‍ സംസ്ഥാന വൈസ് പ്രസിഡന്റ്, വടകര മുനിസിപ്പല്‍ കൗണ്‍സിലര്‍, പുരോഗമന കലാ സാഹിത്യ സംഘം സംസ്ഥാന സമിതി അംഗം എന്നീ നിലയില്‍ പ്രവര്‍ത്തിച്ചിരുന്നു. പണിക്കോട്ടി ഐക്യകേരള കലാസമിതിയുടെയും ഗ്രന്ഥാലയത്തിന്റെയും സ്ഥാപകരില്‍ പ്രമുഖനാണ്. കലാസമിതിക്കു വേണ്ടി നിരവധി നാടകങ്ങള്‍ രചിച്ചു. നാടക സംവിധായകനും അഭിനേതാവുമായിരുന്നു.

മഹിളാ അസോസിയേഷന്‍ വടകര ഏരിയാ കമ്മിറ്റി അംഗം എം.നാരായണിയാണ് ഭാര്യ.  മക്കള്‍: വിജയലക്ഷ്മി, രാധാമണി (കെ.എസ്.ഇ.ബി വടകര നോര്‍ത്ത്), പത്മലോചനന്‍ (ദേശാഭിമാനി കണ്ണൂര്‍), അജിതകുമാരി (ഡോ.മര്‍ഫീസ്  ലാബ് പേരാമ്പ്ര), അനൂപ് കുമാര്‍ (എസ്.ഐ.എച്ച്.എം വെസ്റ്റ്ഹില്‍). മരുമക്കള്‍:  കെ. ശ്രീധരന്‍ (വടകര നഗരസഭാ ചെയര്‍മാന്‍), ബീന, എം.ഇ പവിത്രന്‍ (സി.പി.എം വടകര ടൗണ്‍ ലോക്കല്‍ സെക്രട്ടറി), രജില, മോഹനന്‍ (ഗ്രാമീണ ബാങ്ക്).സഹോദരങ്ങള്‍: കുഞ്ഞിരാമന്‍ (റിട്ട. എസ്.ഐ). പരേതരായ മാതു, ചീരു, കല്ല്യാണി, മാണി.