കൊച്ചി: ചൂടുവെള്ളത്തില്‍ വീണ പൂച്ച പച്ചവെള്ളം കണ്ടാലും പേടിക്കുമെന്ന തന്റെ പ്രസ്താവന ഡബ്ല്യു.സി.സി അംഗങ്ങള്‍ തെറ്റിദ്ധരിച്ചതാകാമെന്നു നടനും സംവിധായകനുമായ ബാബുരാജ്. ആക്രമിക്കപ്പെട്ട നടിയെ ബാബുരാജ് വാക്കുകള്‍കൊണ്ട് അപമാനിച്ചെന്ന ഡബ്ല്യു.സി.സി അംഗങ്ങളുടെ ആരോപണത്തോട് പ്രതികരിക്കുകയായിരുന്നു അദ്ദേഹം.
ആക്രമിക്കപ്പെട്ട നടിയെ എന്നും പിന്തുണയ്ക്കുന്ന ആളാണ് ഞാന്‍. അവരുടെ അവസ്ഥയെക്കുറിച്ചാണ് ഞാന്‍ പറഞ്ഞത്. ചൂടുവെള്ളത്തില്‍ വീണ പൂച്ച പച്ചവെള്ളം കണ്ടാലും പേടിക്കുമെന്നു പറഞ്ഞത് ഒരു പഴഞ്ചൊല്ലാണ്. പാര്‍വതി അതിന്റെ അര്‍ഥമറിയാതെ തെറ്റിദ്ധരിച്ചതാകാം- ബാബുരാജ് പറഞ്ഞു.
ഡബ്ല്യു.സി.സിയുടെ നീക്കം ആക്രമിക്കപ്പെട്ട നടിക്കുവേണ്ടിയല്ലെന്നും അദ്ദേഹം ആരോപിച്ചു. മോഹന്‍ലാലിന്റെ മെക്കിട്ടുകയറുകയാണവര്‍.'അമ്മ'യുടെ ബൈലോ തിരുത്താന്‍ പാടില്ല. ഡബ്ല്യു.സി.സിയുടെ ഓലപ്പാമ്പ് കണ്ടിട്ട് അതു മാറ്റാന്‍ പറ്റുമോ- ബാബുരാജ് ചോദിച്ചു.