ഗയാന: ഇന്ത്യക്കെതിരായ ടെസ്റ്റ് പരമ്പരയ്ക്കുള്ള 13 അംഗ ടീമിനെ വെസ്റ്റിന്‍ഡീസ് പ്രഖ്യാപിച്ചപ്പോള്‍ ടീമിലിടം നേടാതെ വെറ്ററന്‍ താര്ം ക്രിസ് ഗെയ്ല്‍. ഹോം ഗ്രൗണ്ടായ കിങ്സ്റ്റനിലെ സബീന പാര്‍ക്കില്‍ ഇന്ത്യക്കെതിരേ വിടവാങ്ങല്‍ ടെസ്റ്റ് കളിച്ച് വിരമിക്കണമെന്ന ലോകകപ്പിനിടെ പ്രകടിപ്പിച്ച താരത്തിന്റെ ആഗ്രഹം സെലക്ടര്‍മാര്‍ മുഖവിലക്കെടുത്തില്ല. അതേ സമയം, ഓള്‍റൗണ്ടര്‍ റഖീം കോണ്‍വാളിന് അരങ്ങേറ്റത്തിന് അവസരം നല്‍കി. 

രണ്ടു മത്സരങ്ങളടങ്ങുന്ന ടെസ്റ്റ് പരമ്പരയ്ക്ക് 22ന് ആന്റിഗ്വയില്‍ തുടക്കമാകും. നേരത്തെ ലോകകപ്പോടെ വിരമിക്കുമെന്ന് പറഞ്ഞിരുന്ന ഗെയ്ല്‍ പിന്നീട് ഈ തീരുമാനം മാറ്റുകയായിരുന്നു. 

വിന്‍ഡീസ് എ ടീമിനായി പുറത്തെടുത്ത പ്രകടനമാണ് കോണ്‍വാളിന് ടെസ്റ്റ് ടീമിലേക്കുള്ള വഴിയൊരുക്കിയത്. 2014ല്‍ ഫസ്റ്റ് ക്ലാസ് ക്രിക്കറ്റില്‍ അരങ്ങേറ്റം കുറിച്ച കോണ്‍വാള്‍ 55 മത്സരങ്ങളില്‍ നിന്ന് 260 വിക്കറ്റുകള്‍ വീഴ്ത്തിയിട്ടുണ്ട്. ഒരു സെഞ്ച്വറിയും 13 അര്‍ധ സെഞ്ചുറിയും അടക്കം 2224 റണ്‍സും താരത്തിന്റെ അക്കൗണ്ടിലുണ്ട്.

വിന്‍ഡീസ് ടീം: ജേസണ്‍ ഹോള്‍ഡര്‍ (ക്യാപ്റ്റന്‍), ക്രെയ്ഗ് ബ്രാത്‌വെയ്റ്റ്, ഡാരെന്‍ ബ്രാവോ, ഷമറ ബ്രൂക്‌സ്, ജോണ്‍ കാംബെല്‍, റോസ്റ്റന്‍ ചെയ്‌സ്, റഖീം കോണ്‍വാള്‍, ഷെയ്ന്‍ ഡോര്‍വിച്ച്, ഷാനോന്‍ ഗബ്രിയേല്‍, ഷിംറോണ്‍ ഹെറ്റ്‌മെയര്‍, ഷായ് ഹോപ്പ്, കീമോ പോള്‍, കെമര്‍ റോച്ച്.