കാബൂള്‍: അഫ്ഗാനിസ്ഥാന്‍ വിക്കറ്റ് കീപ്പര്‍ ബാറ്റ്‌സ്മാന്‍ മുഹമ്മദ് ഷഹ്‌സാദിനെ അനിശ്ചിത കാലത്തേക്ക് ക്രിക്കറ്റില്‍നിന്ന് സസ്‌പെന്‍ഡ് ചെയ്ത് അഫ്ഗാനിസ്ഥാന്‍ ക്രിക്കറ്റ് ബോര്‍ഡ്. അച്ചടക്ക ലംഘനമാണ് താരത്തെ സസ്‌പെന്‍ഡ് ചെയ്തതിലേക്ക് നയിച്ചതെന്ന് അഫ്ഗാന്‍ ക്രിക്കറ്റ് ബോര്‍ഡ് കഴിഞ്ഞ ദിവസം പുറത്തിറക്കിയ പത്രക്കുറിപ്പില്‍ വ്യക്തമാക്കി. നേരത്തെ ലോകകപ്പിനിടെ കാല്‍മുട്ടിനേറ്റ പരുക്കിനെത്തുടര്‍ന്ന് ഷഹ്‌സാദ് ടീമില്‍ നിന്ന് പുറത്തായിരുന്നു. 

എന്നാല്‍ പിന്നീട് തനിക്ക് പരുക്കില്ലെന്നും അനാവശ്യമായി ടീമില്‍ നിന്ന് പുറത്താക്കിയതാണെന്നും വിമര്‍ശിച്ച് ഷഹ്‌സാദ് രംഗത്തെത്തി. ഇത് വന്‍ വിവാദമാവുകയും ചെയ്തു. ഇതാണ് താരത്തെ വിലക്കിലേക്ക് നയിച്ചതെന്നാണ് സൂചന.

അതേസമയം ഷഹ്‌സാദ് ക്രിക്കറ്റ് ബോര്‍ഡിന്റെ അനുമതിയില്ലാതെ വിദേശയാത്ര നടത്തിയെന്നും ഇത് തികഞ്ഞ അച്ചടക്ക ലംഘനമാണെന്നും അഫ്ഗാന്‍ ക്രിക്കറ്റ് ബോര്‍ഡ് ചൂണ്ടിക്കാട്ടി.