റായ്പൂര്‍: ഛത്തിസ്ഗഡിലെ രാജനന്ദഗോണ്‍ ജില്ലയില്‍ ചരക്ക് ലോറിയുമായി കൂട്ടിയിടിച്ച് കാര്‍(എസ്.യു.വി) യാത്രക്കാരായ 10 പേര്‍ മരിച്ചു. നാലുപേര്‍ക്ക് ഗുരുതരമായി പരുക്കേറ്റു. ഇന്നലെ പുലര്‍ച്ചെ രാജനന്ദഗോണ്‍-ദുര്‍ഗ് റോഡില്‍വച്ചായിരുന്നു അപകടം.
ദോണ്‍ഗര്‍ഗഡ് പട്ടണത്തിലെ മാ ബാമലേശ്വരി ക്ഷേത്രത്തില്‍ നടന്ന നവരാത്രി ആഘോഷ ചടങ്ങില്‍ പങ്കെടുത്ത് മടങ്ങുകയായിരുന്ന കുടുംബം സഞ്ചരിച്ച കാറാണ് അപകടത്തില്‍പ്പെട്ടത്.
മറ്റൊരു വാഹനത്തെ മറികടക്കാനുള്ള കാറിന്റെ ശ്രമമാണ് എതിരേ വന്ന ലോറിയില്‍ ഇടിക്കാനിടയായത്. ഒന്‍പതുപേര്‍ സംഭവ സ്ഥലത്തും മറ്റൊരാള്‍ ആശുപത്രിയിലുമാണ് മരിച്ചത്. പരുക്കേറ്റവരെയെല്ലാം തൊട്ടടുത്ത ആശുപത്രിയിലേക്ക് മാറ്റിയതായി പൊലിസ് അറിയിച്ചു.