ആലക്കോട്: ഉദയഗിരി മാമ്പൊയില്‍ സെന്‍ട്രല്‍ റോഡ് നിര്‍മാണത്തില്‍ ക്രമക്കേട് ആരോപിച്ച് നാട്ടുകാര്‍ രംഗത്ത്. പി.എം.ജി.എസ്.വൈ പദ്ധതിയില്‍ ഉള്‍പ്പെടുത്തി രണ്ടുകോടിയോളം രൂപാ ചെലവിലാണ് റോഡ് നിര്‍മിച്ചത്. റോഡ് നിര്‍മാണം പൂര്‍ത്തിയാക്കി ഉദ്ഘാടനം കഴിഞ്ഞെങ്കിലും എസ്റ്റിമേറ്റ് പ്രകാരമുള്ള സംരക്ഷണഭിത്തിയും ഓവുചാലുകളും നിര്‍മിക്കാന്‍ കരാറുകാരന്‍ തയാറായില്ല.
മഴക്കാലം തുടങ്ങിയതോടെ ഉയര്‍ന്ന പ്രദേശങ്ങളില്‍ നിന്നുള്ള വെള്ളം കുത്തിയൊഴുകുന്നതു റോഡിന്റെ തകര്‍ച്ചയ്ക്കു കാരണമാകുന്നുണ്ട്. ഉദ്ഘാടനത്തിന്റെ മുന്നോടിയായി റോഡരികില്‍ സ്ഥാപിച്ച സിഗ്‌നല്‍ ബോര്‍ഡുകള്‍ മണ്ണില്‍ കുഴിച്ചിട്ട നിലയിലാണ്. മഴ തുടങ്ങിയതോടെ ഇവയില്‍ പലതും ഇളകാന്‍ തുടങ്ങി. രണ്ടു കിലോമീറ്റര്‍ ദൈര്‍ഘ്യമുള്ള റോഡിനു രണ്ടുകോടി രൂപയോളം അനുവദിച്ചിട്ടും നിര്‍മാണത്തില്‍ കൃതിമം നടത്തിയതിനെതിരെ നാട്ടുകാര്‍ ജില്ലാ കലക്ടര്‍ക്കു പരാതി നല്‍കി. എട്ടുമീറ്റര്‍ വീതിയില്‍ നിര്‍മിക്കേണ്ട റോഡിനു പലയിടത്തും ആറുമീറ്റര്‍ പോലും ഇല്ലാത്ത അവസ്ഥയാണ്.
സംരക്ഷണഭിത്തി നിര്‍മിക്കാത്തതിനാല്‍ ചെറിയൊരു മഴ വന്നപ്പോള്‍ തന്നെ പലയിടത്തും മണ്ണിടിച്ചിലും തുടങ്ങി. വര്‍ഷങ്ങളോളം ഉപയോഗിക്കേണ്ട റോഡ് ഒരുമാസം കൊണ്ട് തന്നെ തകരാന്‍ തുടങ്ങിയതോടെ നാട്ടുകാരും ആശങ്കയിലാണ്. എസ്റ്റിമേറ്റ് പ്രകാരമുള്ള പ്രവൃത്തി നടത്താതെ നിര്‍മാണം അവസാനിപ്പിച്ച കരാറുകാരനെതിരെ നിയമ നടപടി സ്വീകരിക്കണമെന്ന ആവശ്യവും ശക്തമാണ്.