ബദിയടുക്ക: കഴിഞ്ഞ ദിവസമുണ്ടായ കനത്ത മഴയില്‍ പരക്കെ നാശം. മുള്ളേരിയക്കു സമീപം ബെള്ളൂര്‍ ഹയര്‍ സെക്കന്‍ഡറി സ്‌കൂളിന്റെ ചുറ്റു മതില്‍ തകര്‍ന്നു. സ്‌കൂള്‍ പ്രവൃത്തി ദിവസമല്ലാത്തതിനാല്‍ വന്‍ അപകടമാണ് ഒഴിവായത്. കഴിഞ്ഞ ദിവസം വൈകുന്നേരം ഉണ്ടായ കാറ്റില്‍ പെര്‍ള കാട്ടുകുക്കെ റോഡിലെ സൂര്‍ഡെലുവില്‍ റോഡരികിലെ കൂറ്റന്‍ മരവും കട പുഴകി.
ആ സമയത്ത് അതു വഴി യാത്രക്കാരെയും കയറ്റി വന്ന ഓട്ടോറിക്ഷ ഡ്രൈവര്‍ മരം റോഡിലേക്ക് വീഴുന്നതു കണ്ട് പെട്ടെന്നു പിന്നോട്ടെടുത്തതിനാല്‍ വന്‍ ദുരന്തം ഒഴിവായി. മണിക്കൂറുകളോളം ഗതാഗതം തടസപെട്ടു. നാട്ടുകാരുടെ നേതൃത്വത്തില്‍ മണിക്കൂറുകളുടെ ശ്രമഫലമായാണ് മരം മുറിച്ചു മാറ്റി ഗതാഗതം പുനഃസ്ഥാപിച്ചത്.