ഇരിട്ടി: സഞ്ചാരികള്‍ ഒഴുകിയെത്തുന്നുണ്ടെങ്കിലും പരാധീനതകളില്‍ വീര്‍പ്പുമുട്ടുകയാണ് വിമാനത്താവള നഗരത്തിലെ പ്രധാന ടൂറിസം കേന്ദ്രം. പറഞ്ഞുവരുന്നതു പഴശ്ശി ഡാമും അതിനോടു ചേര്‍ന്ന വിനോദ സഞ്ചാര കേന്ദ്രത്തിന്റെയും അവസ്ഥയാണ്. അവധി ദിനങ്ങളിലടക്കം സഞ്ചാരികള്‍ ഏറെയെത്തുന്നുണ്ടെങ്കിലും അടിസ്ഥാന സൗകര്യമില്ലായ്മായാണ് പഴശ്ശിയെ പിന്നോട്ടടിപ്പിക്കുന്നത്. ഇന്നലെ മാത്രം വിനോദ സഞ്ചാരികളായി എത്തിയത് നാലായിരത്തില്‍പ്പരം ആളുകള്‍.
സഞ്ചാരികള്‍ക്ക് മൂത്രശങ്ക ഉള്‍പ്പെടെ തീര്‍ക്കാനുള്ള ആധുനിക ശൗചാലയം കാടുകയറി നശിക്കുകയാണ്. സഞ്ചാരികളെ ആകര്‍ഷിക്കാനായി പഴശ്ശി ഡാമിനോടു ചേര്‍ന്ന് ഡി.ടി.പി.സി നിര്‍മിച്ച ഉദ്യാനത്തോടനുബന്ധിച്ചുള്ള ശൗചാലയങ്ങളാണ് നശിക്കുന്നത്. ചെങ്കല്‍ ചെത്തി മനോഹരമായി നിര്‍മിച്ച കെട്ടിടത്തിനകത്താണ് ശൗചാലയങ്ങള്‍ നിര്‍മിച്ചത്. ഡി.ടി.പി.സി ആണ് ഇതിന്റെ കൈവശക്കാരെങ്കിലും ശൗചാലയ നവീകരണത്തിനു യാതൊരു നടപടിയും അധികൃതരുടെ ഭാഗത്തുനിന്ന് ഉണ്ടാകുന്നില്ല.
കണ്ണൂര്‍ വിമാനത്താവളം സന്ദര്‍ശകര്‍ക്കായി തുറന്നതോടെ സ്‌കൂള്‍, കോളജ് വിദ്യാര്‍ഥികള്‍ ഉള്‍പ്പെടെ നിരവധിപേരാണ് ഇവിടെ എത്തുന്നത്. കഴിഞ്ഞദിവസം വിമാനത്താവളം കണ്ട് മടങ്ങിയ സ്ത്രീകളും കുട്ടികളും ഉള്‍പ്പെടെയുള്ളവര്‍ പഴശ്ശി ഡാം കാണുന്നതിനായി എത്തിയെങ്കിലും പൊതുശൗചാലയ സൗകര്യമില്ലാത്തതിനാല്‍ ശൗചാലയത്തിനായി ഇറിഗേഷന്‍ വകുപ്പിന്റെ ഓഫിസ് ടോയ്‌ലറ്റും സമീപത്തെ ചില വീടുകളെയുമാണ് ആശ്രയിച്ചത്. ലക്ഷങ്ങള്‍ മുടക്കി നിര്‍മിച്ച ശൗചാലയം കാടുകയറി നശിക്കുമ്പോള്‍ ഡി.ടി.പി.സി മറ്റൊരു ടോയ്‌ലറ്റ് ബ്ലോക്ക് ഉണ്ടാക്കി ലക്ഷങ്ങള്‍ പാഴാക്കിയെങ്കിലും ഇതുവരെ സന്ദര്‍ശകര്‍ക്കു തുറന്നുനല്‍കിയിട്ടില്ല.
കാടുകയറി നശിക്കുന്ന ടോയ്‌ലറ്റുകളില്‍ ചെറിയ അറ്റകുറ്റപ്പണി നടത്തിയാല്‍ വൈദ്യുതിയും വെള്ളവും പുനഃസ്ഥാപിക്കാന്‍ കഴിയുമെന്നിരിക്കെയാണ് ശൗചാലയ നിര്‍മാണത്തിന്റെ മറവില്‍ ലക്ഷങ്ങളുടെ ധൂര്‍ത്തും മറ്റൊരു വഴിക്കു നടക്കുന്നത്.
വിമാനത്താവളം ഉദ്ഘാടനം ചെയ്യുന്നതോടെ വിനോദസഞ്ചാര മേഖലയെന്ന നിലയില്‍ വിദേശികള്‍ ഉള്‍പ്പെടെയുള്ളവര്‍ സന്ദര്‍ശനം നടത്താന്‍ സാധ്യതയുള്ള ജില്ലയിലെ തന്നെ പ്രധാന കേന്ദ്രമായ പഴശ്ശി ഡാമും അനുബന്ധ പരിസരത്തും പ്രാഥമികാവശ്യങ്ങള്‍ പോലും നിര്‍വഹിക്കാന്‍ സാധിക്കാത്ത അവസ്ഥയാണുള്ളത്. അടിയന്തിരമായും ബന്ധപ്പെട്ടവര്‍ ഇടപെട്ട് ടോയ്‌ലറ്റ് നവീകരണം നടത്തണമെന്ന ആവശ്യമാണ് ഇവിടെയെത്തുന്ന വിനോദസഞ്ചാരികളുടെ ആവശ്യം.