തിരുവനന്തപുരം: പ്രളയത്തെ തുടര്‍ന്ന് താറുമാറായ ട്രെയിന്‍ ഗതാഗതം സാധാരണ നിലയിലേക്ക്. കഴിഞ്ഞ ദിവസങ്ങളില്‍ റദ്ദാക്കിയ മിക്ക ട്രെയിനുകളും ഓടിത്തുടങ്ങി. കോഴിക്കോട് ഷൊര്‍ണൂര്‍ ലൈന്‍ കൂടി പുനഃസ്ഥാപിച്ചതോടെ മംഗളൂരു കോഴിക്കോട് തിരുവനന്തപുരം ലൈനിലെ മലബാര്‍, മാവേലി, ജനശതാബ്ദി തുടങ്ങിയ ട്രെയിനുകളെല്ലാം ഓടി.
പാതയിലെ തടസം നീങ്ങിയതോടെ തിരുവനന്തപുരത്ത് നിന്നുള്ള കോഴിക്കോട് മംഗളൂരു വഴിയുള്ള ദീര്‍ഘൂര ട്രെയിനുകളെല്ലാം ഓടിത്തുടങ്ങി.

അതേസമയം റാക്കുകളില്ലാത്തതടക്കമുള്ള സാങ്കേതിക പ്രശ്‌നങ്ങള്‍ സര്‍വിസുകളെ ബാധിക്കുന്നുണ്ട്. ഇന്നലെ പത്ത് പാസഞ്ചറുകളും അഞ്ച് എക്‌സ്പ്രസ് ട്രെയിനുകളും റദ്ദാക്കി.
സര്‍വിസുകള്‍ പുനഃസ്ഥാപിച്ചെങ്കിലും മഴക്കെടുതിയെതുടര്‍ന്ന് ട്രെയിനുകള്‍ വൈകുന്ന പ്രശ്‌നത്തിന് ഇനിയും പരിഹാരമായിട്ടില്ല. ഇന്നലെ നാഗര്‍കോവില്‍ മംഗളൂരു പരുശുറാം എക്‌സ്പ്രസ് നാലു മണിക്കൂര്‍ വൈകിയാണ് പുറപ്പെട്ടത്.
മറ്റ് ട്രെയിനുകളും ശരാശരി അരമണിക്കൂര്‍ വൈകിയാണ് സര്‍വിസ് നടത്തിയത്. എറണാകുളം നിസാമുദ്ദീന്‍ തുരന്തോ എക്‌സ്പ്രസ്, നിസാമുദ്ദീന്‍ എറണാകുളം മില്ലേനിയം സൂപ്പര്‍ ഫാസ്റ്റ്, ശ്രീഗംഗ നഗര്‍ കൊച്ചുവേളി എക്‌സ്പ്രസ്, പട്‌ന എറണാകുളം എക്‌സ്പ്രസ്, എറണാകുളം പുണെ എക്‌സ്പ്രസ്, ഷാലിമാര്‍ തിരുവനന്തപുരം എക്‌സ്പ്രസ് എന്നിവയാണ് ഇന്നലെ റദ്ദാക്കിയ എക്‌സ്പ്രസുകള്‍. സാങ്കേതിക കാരണങ്ങളാല്‍ എറണാകുളം ഓഖ ദ്വൈവാര എക്‌സ്പ്രസ് ഇന്ന് സര്‍വിസ് നടത്തില്ലെന്ന് റെയില്‍വേ അറിയിച്ചു.