ലണ്ടന്‍: ഇംഗ്ലണ്ടും ആസ്‌ത്രേലിയയും തമ്മിലുള്ള ആഷസ് ടെസ്റ്റ് ക്രിക്കറ്റില്‍ ഇന്ന് രണ്ടാം പോര്. ആദ്യ ടെസ്റ്റില്‍ ജയം സ്വന്തമാക്കിയ ഓസീസ് തികഞ്ഞ ആത്മവിശ്വാസത്തിലാണ്. ലോകകപ്പിന് ശേഷം ആദ്യ മത്സരത്തില്‍ തന്നെ തിരിച്ചടി നേരിട്ട ഇംഗ്ലീഷ് സംഘം മികച്ച ഒരുക്കവുമായിട്ടാണ് രണ്ടാം മത്സരത്തിന് ഇറങ്ങുന്നത്. പന്ത് ചുരണ്ടല്‍ വിവാദത്തിന് ശേഷം ഏറെ നാളായി കളത്തിന് പുറത്തായിരുന്ന ആസ്‌ത്രേലിയന്‍ താരം സ്റ്റീവ് സ്മിത്തിന്റെ ബാറ്റിങ്ങായിരുന്നു ഓസീസിനെ സഹായിച്ചത്.
രണ്ട് ഇന്നിങ്‌സിലും സ്മിത്ത് സെഞ്ചുറി കണ്ടെത്തിയിരുന്നു. ആദ്യ മത്സരത്തലെ ആദ്യ ഇന്നിങ്‌സില്‍ 219 പന്തില്‍ 144 റണ്‍സും രണ്ടാം ഇന്നിങ്‌സില്‍ 207 പന്തില്‍ 142 റണ്‍സുമായിരുന്നു സ്മിത്ത് സ്വന്തമാക്കിയത്. ആദ്യ മത്സരത്തില്‍ പുറത്തായിരുന്ന ഇംഗ്ലീഷ് യുവ ബൗളര്‍ ജൊഫ്ര ആര്‍ച്ചര്‍ ഇന്ന് അരങ്ങേറ്റത്തിനായി ഇറങ്ങിയേക്കും. അഞ്ച് മത്സരങ്ങളുള്ള പരമ്പരയില്‍ ആദ്യ മത്സരം സ്വന്തമാക്കിയ ഓസീസ് മികച്ച ആത്മവിശ്വാസത്തിലാണ്. അതേസമയം നാട്ടിലെ ആദ്യ തോല്‍വിയുടെ ടെന്‍ഷന്‍ ഇംഗ്ലീഷ് സംഘത്തെ അലട്ടുന്നുണ്ട്.

തുടര്‍ന്നുള്ള മത്സരങ്ങളില്‍ വെന്നിക്കൊടി പാറിച്ച് ലോകകപ്പിന് ശേഷം ആഷസും സ്വന്തമാക്കാനുള്ള ഒരുക്കത്തിലാണ് ജോ റൂട്ടും സംഘവും. ആദ്യ ടെസ്റ്റിന് ഇറങ്ങിയ സംഘത്തില്‍ ചെറിയ മാറ്റവുമായിട്ടായിരിക്കും രണ്ടാം മത്സരത്തില്‍ ഇംഗ്ലണ്ട് ഇറങ്ങുക. ആദ്യ മത്സരം സ്വന്തമാക്കിയ ഓസീസ് ടീമില്‍ കാര്യമായ മാറ്റങ്ങളൊന്നും നടത്തേണ്ടതില്ലെന്ന തീരുമാനത്തിലാണ്. വൈകിട്ട് 3.30 മുതലാണ് മത്സരം.