തൃശൂര്‍: കുപ്രസിദ്ധ മോഷ്ടാവ് കോഴിക്കോട് കാട്ടുവിള പടിഞ്ഞാറെതില്‍ വീട്ടില്‍ സുദര്‍ശനനെ (42) സിറ്റി പൊലിസ് കമ്മിഷറുടെ നേതൃത്വത്തിലുള്ള എല്‍.പി സ്വകാഡ് പിടികൂടി.
മണ്ണുത്തി വെള്ളാനിക്കരയില്‍ മുറ്റത്തു കളിച്ചുകൊണ്ടിരുന്ന ഒന്നര വയസുള്ള കുട്ടിയുടെ സ്വര്‍ണമാല കവര്‍ന്ന കേസിലും വെളളാനിക്കരയിലെ ലേഡീസ് ഹോസ്റ്റലില്‍ കയറി സ്വര്‍ണാഭാരണങ്ങളൂം പണവും കവര്‍ന്ന കേസിലും മണ്ണുത്തി വെറ്റിനറി കോളജിന്റെ ക്വാര്‍ട്ടേഴ്‌സില്‍ നിന്ന് അലമാര കുത്തിത്തുറന്ന് പണം കവര്‍ന്ന കേസിലും ഇയാള്‍ പ്രതിയാണ്.
വിവിധയിടങ്ങളില്‍ വീടു വാടകയ്ക്ക് എടുത്ത് താമസിച്ച ശേഷം പ്രദേശത്ത് കറങ്ങി നടന്ന് പൂട്ടി കിടക്കുന്ന വീടുകള്‍ മനസിലാക്കി കുത്തിത്തുറന്ന് മോഷണം നടത്തുന്നതാണ് ഇയാളുടെ രീതി.
ഇത്തരത്തില്‍ നിരവധി കേസുകളും ഇയാളുടെ പേരിലുണ്ടെന്ന് പൊലിസ് പറഞ്ഞു. ഒല്ലൂക്കര സര്‍വീസ് ബാങ്ക് നല്ലങ്കര ശാഖയ്ക്ക് സമീപം മോഷണശ്രമത്തിനിടെ ഇയാള്‍ പിടിയിലായിരുന്നു.
പിന്നീട് ഒളിവില്‍പ്പോയ പ്രതിയെ പിടികിട്ടാപ്പുള്ളിയായി പ്രഖ്യാപിക്കുകയായിരുന്നു. ഒളിവില്‍ കഴിഞ്ഞു വരുന്നതിനിടെ പാലക്കാട് പെരിങ്ങോട്ടുകുറിശിയില്‍ നിന്നാണ് സുദര്‍ശനനെ പൊലിസ് പിടികൂടിയത്. എല്‍.പി സ്‌ക്വാഡ് അംഗങ്ങളായ സാജ്, പ്രദീപ് എന്നിവര്‍ ചേര്‍ന്നാണ് പ്രതിയെ പിടികൂടിയത്.