ന്യൂഡല്‍ഹി: ജി.എസ്.ടി നടപ്പാക്കാനുള്ള കേന്ദ്രസര്‍ക്കാര്‍ തീരുമാനത്തിനെതിരെ സമ്മര്‍ദ്ദത്തിലാക്കുകയെന്ന മാധ്യമ അജണ്ട വിലപ്പോവില്ലെന്ന്  കേന്ദ്രധനമന്ത്രി അരുണ്‍ ജെയ്റ്റ്‌ലി. കമല്‍ഹാസന്‍ അടക്കമുള്ള പ്രമുഖര്‍ ജി.എസ്.ടിക്കെതിരെ രംഗത്തു വന്ന സാഹചര്യത്തിലാണ് ധനമന്ത്രിയുടെ പ്രതികരണം. സിനിമമേഖലയില്‍ 28 ശതമാനം നികുതി വര്‍ധിപ്പിച്ചതിനെതിരെയാണ് കമല്‍ രംഗത്തു വന്നത്.

കേന്ദ്രം ഒരോ മേഖലയിലെ പ്രാതിനിധ്യവും വ്യക്തമായി മനസിലാക്കിയിട്ടുണ്ട്. അതിനാല്‍ മാധ്യമങ്ങളെ ഉപയോഗിച്ച് സര്‍ക്കാറിനു മേല്‍ സമ്മര്‍ദ്ദം ചെലുത്താനുള്ള നടപടി വിലപ്പോകില്ല. ജി.എസ്.ടിയില്‍ തിരുത്ത് വരുത്താന്‍ ഉദ്ദേശിക്കുന്നില്ലെന്നും ജെയ്റ്റ്‌ലി സി.എന്‍.ബി.സി ടിവി 18ന്  നല്‍കിയ അഭിമുഖത്തില്‍ വ്യക്തമാക്കി.

നിലവില്‍ വിനോദ നികുതിയുടെ ശരാശരി 29.1 ശതമാനമായിരുന്നു. ജി.എസ്.ടിയുടെ കീഴില്‍ അത്  28 ശതമാനമാക്കി നിശ്ചയിക്കുകയാണുണ്ടായതെന്നും അദ്ദേഹം വ്യക്തമാക്കി. മാത്രമല്ല ജിയഎസ്.ടി നടപ്പിലാവുന്നതോടെ പലതിനും നിലവിലുള്ളതിനേക്കാള്‍ വില കുറയുകയാണ് ചെയ്യുകയെന്നും അദ്ദേഹം വ്യക്തമാക്കി.

ജി.എസ്.ടി പ്രാബല്യത്തില്‍ വന്നാല്‍ പ്രാദേശിക സിനിമ മേഖല തകരുമെന്നും താനടക്കമുള്ള പലരും അഭിനയം നിര്‍ത്തേണ്ടി വരുമെന്നും കമല്‍ ഹാസന്‍ പറഞ്ഞിരുന്നു. 'ചരക്കു സേവന നികുതി 18 ശതമനമാക്കി കുറച്ചില്ലെങ്കില്‍ പ്രാദേശിക സിനിമകള്‍ക്ക് അതിജീവിക്കാനാകില്ല. തോന്നിയ പോലെ നികുതി പിരിക്കാന്‍ ഇതെന്താ ഈസ്റ്റ് ഇന്ത്യാ കമ്പനിയാണോ'- എന്നായിരുന്നു കമലിന്റെ പ്രതികരണം.