തിരുവനന്തപുരം: ഒരു കോടി വൃക്ഷഥൈകള്‍ നട്ട് പരിസ്ഥിതിദിനത്തെ വരവേല്‍ക്കുന്ന സര്‍ക്കാരിന്റെ പദ്ധതി ആവേശത്തോടെ സ്വീകരിച്ച് ജില്ലാ കളക്ടറേറ്റും. കളക്ടറേറ്റ് വളപ്പില്‍ പ്ലാവിന്‍ തൈ നട്ട് കളക്ടര്‍ എസ് വെങ്കടേസപതി പരിസ്ഥിതിദിനാചരണം ഉദ്ഘാടനം ചെയ്തു.
നടുന്ന ഓരോ ചെടിയുടെയും അതിജീവനം അവരവര്‍ ഉറപ്പുവരുത്തണമെന്നും അദ്ദേഹം പറഞ്ഞു. തുടര്‍ന്ന് എ ഡി എം ജോണ്‍ വി സാമുവല്‍, ഡെപ്യൂട്ടി കളക്ടര്‍ വി. വിനോദ് എന്നിവരും തൈകള്‍ നട്ടു. കളക്ടറേറ്റില്‍ നടപ്പാക്കുന്ന സ്മൃതിവനം പരിപാടിയുടെയും ഭാഗമായി സ്റ്റാഫ് റിക്രിയേഷന്‍ ക്ലബ്ബിന്റെ സഹായത്തോടെ ആയിരത്തോളം ഫലവൃക്ഷതൈകള്‍ നട്ടുവളര്‍ത്താനാണ് തീരുമാനം. ഈ വരുന്ന രണ്ടാം ശനിയാഴ്ച ബാക്കി തൈകള്‍ കൂടി നടും.