എടക്കര: കഴിഞ്ഞ ദിവസങ്ങളിലുണ്ടായ ഉരുള്‍പൊട്ടല്‍, മണ്ണിടിച്ചില്‍, മലവെളളപ്പാച്ചില്‍ എന്നിവയില്‍ പോത്തുകല്ല് പഞ്ചായത്തില്‍ മാത്രം ഇരുന്നൂറിലേറെ വീടുകള്‍ നശിച്ചതായി ഗ്രാമപ്പഞ്ചായത്ത് പ്രസിഡന്റ് സി.കരുണാകരന്‍ പിള്ള പറഞ്ഞു.
276 വീടുകള്‍ ഭാഗികമായി തകര്‍ന്ന് വാസയോഗ്യമല്ലാതായി. കടുത്ത മഴയും വെള്ളപ്പൊക്കവും മൂലം പഞ്ചായത്തിന്റെ സമസ്ത മേഖലകളും നിശ്ചലമായിരിക്കുകയാണ്. തൊഴിലുറപ്പ് പദ്ധതിയിലെ പ്രവൃത്തികളും നിലച്ചു. റബ്ബര്‍ ടാപ്പിങ് അടക്കമുള്ള യാതൊരു തൊഴിലുകളും നടക്കുന്നില്ല. പല കടകളിലും അരിയടക്കമുള്ള അവശ്യ സാധനങ്ങള്‍ ലഭ്യമല്ല. ഉള്ളില്‍ പലതിനും വില കൂടിയിട്ടുണ്ട്.
വെള്ളിയാഴ്ച രാവിലെ പി.വി.അന്‍വര്‍ എം.എല്‍എയുടെ അധ്യക്ഷതയില്‍ പോത്തുകല്ല് പഞ്ചായത്തില്‍ അവലോകന യോഗം ചേര്‍ന്നു. വിവിധ വകുപ്പുദ്യോഗസ്ഥര്‍ യോഗത്തില്‍ പങ്കെടുത്തു. ശനിയാഴ്ച മുതല്‍ അതത് പഞ്ചായത്തംഗങ്ങളുടെ നേതൃത്വത്തില്‍ ശുചീകരണ പ്രവര്‍ത്തനങ്ങള്‍ നടത്താന്‍ യോഗം തീരുമാനിച്ചു. ആരോഗ്യ വകുപ്പിലെ ഓരോ ജീവനക്കാരും ആശ പ്രവര്‍ത്തകരും സംഘത്തിലുണ്ടാവും.
അറുപതില്‍പ്പരം ഡോക്ടര്‍മാര്‍ പഞ്ചായത്തിലെ വിവിധ ക്യാംപുകളിലും മറ്റു സ്ഥലങ്ങളിലുമായി ജോലി ചെയ്തുവരുന്നു. ആവശ്യത്തിന് മരുന്നുള്ളതായി യോഗത്തില്‍ പ്രസിഡന്റ് അറിയിച്ചു.