നെല്ലായ: ദേശീയ തപാല്‍ ദിനത്തോടനുബന്ധിച്ച് കച്ചേരിക്കുന്ന് നോര്‍ത്ത് എ.എം.എല്‍.പി സ്‌കൂളിലെ രണ്ടാം ക്ലാസ് വിദ്യാര്‍ഥികള്‍ ചെര്‍പ്പുളശ്ശേരി പോസ്റ്റ് ഓഫിസ് സന്ദര്‍ശിച്ചു. അന്യം നിന്നുപോയി കൊണ്ടിരിക്കുന്ന പോസ്റ്റല്‍ സംവിധാനങ്ങളെക്കുറിച്ചും അതിന്റെ ഉപയോഗ രീതികളെക്കുറിച്ചും അറിയാനുള്ള ഈ സന്ദര്‍ശനം വിദ്യാര്‍ഥികളില്‍ നവ്യാനുഭവമായി മാറി.
ഇന്ത്യന്‍ തപാലിന്റെ ചരിത്രവും , വാര്‍ത്താവിനിമയ സംവിധാനത്തില്‍ സംഭവിച്ചുകൊണ്ടിരിക്കുന്ന മാറ്റങ്ങളെ കുറിച്ചും, തപാല്‍ നിക്ഷേപങ്ങളുടെ സവിശേഷതകളെ കുറിച്ചും പോസ്റ്റ് കാര്‍ഡുകളെ കുറിച്ചും ഇന്‍ലന്‍ഡ് കാര്‍ഡുകളെ കുറിച്ചും ,സ്റ്റാമ്പുകളെകുറിച്ചും പോസ്റ്റ് മാസ്റ്റര്‍ രാമചന്ദ്രന്‍ കുട്ടികള്‍ക്ക് അവബോധം നല്‍കി. പോസ്റ്റ് ഓഫിസില്‍ എത്തിയ വിദ്യാര്‍ഥികളെ പോസ്റ്റോഫിസ് ജീവനക്കാര്‍ മിഠായി നല്‍കി സ്വീകരിച്ചു. 50 പൈസയുടെ പോസ്റ്റ് കാര്‍ഡും വങ്ങിച്ച് കത്തയക്കാനുള്ള ഒരുക്കത്തിലാണ് വിദ്യാര്‍ഥികള്‍ മടങ്ങിയത്. അധ്യാപകരായ അല്‍ത്താഫ് മംഗലശ്ശേരി , സുഹൈല പോസ്റ്റോഫിസ് സന്ദര്‍ശനത്തിന് നേതൃത്വം നല്‍കി.