തിരുവനന്തപുരം: വ്യാപകമായ തോതില്‍ ക്വാറികള്‍ ആരംഭിക്കുന്നതിന് അവസരമൊരുക്കുന്ന മന്ത്രിസഭാ തീരുമാനവും തുടര്‍ ഉത്തരവും ബന്ധപ്പെട്ട നടപടികളും റദ്ദാക്കണമെന്ന് വി.എം സുധീരന്‍ മുഖ്യമന്ത്രിയോട് ആവശ്യപ്പെട്ടു. ഭൂപതിവ് ചട്ടങ്ങള്‍ ഭേദഗതി ചെയ്ത് പട്ടയഭൂമിയില്‍ ഖനനം നടത്തുന്നതിന് വഴിയൊരുക്കുന്ന മന്ത്രിസഭാ തീരുമാനം ഉïായത് ഇക്കഴിഞ്ഞ മാര്‍ച്ച് അഞ്ചിനാണ്. ഉത്തരവ് മാര്‍ച്ച് എട്ടിനും. ജിയോളജിസ്റ്റും കൃഷി ഓഫിസറും വില്ലേജ് ഓഫിസറും ഉള്‍പ്പെടുന്ന കമ്മിറ്റി സ്ഥലം പരിശോധിച്ച് കൃഷിക്ക് യോഗ്യമല്ലെന്നും ഖനനയോഗ്യമാണെന്നുമുള്ള റിപ്പോര്‍ട്ട് കലക്ടര്‍ക്ക് നല്‍കുന്നതിന്റെ അടിസ്ഥാനത്തില്‍ കലക്ടര്‍ എന്‍.ഒ.സി നല്‍കി ഖനനം തുടങ്ങാം എന്നായിരുന്നു തീരുമാനം. പരിസ്ഥിതി-സാമൂഹ്യ ആഘാതങ്ങളെ കുറിച്ച് യാതൊരു പരിശോധനയ്ക്കുള്ള വ്യവസ്ഥ പോലും ഇല്ലാതെയാണ് ഈ തീരുമാനം എന്നത് തികച്ചും അത്ഭുതകരമാണെന്നും അദ്ദേഹം പറഞ്ഞു.
പട്ടയഭൂമിയില്‍ വ്യാപകമായി ഖനനം നടത്താന്‍ സമ്പൂര്‍ണ സ്വാതന്ത്ര്യം നല്‍കുന്ന മന്ത്രിസഭാ തീരുമാനം പ്രകൃതിക്കും മനുഷ്യനും മേല്‍ വന്‍ ആഘാതമേല്‍പ്പിക്കും. അതിനാല്‍ തീരുമാനവും ബന്ധപ്പെട്ട നടപടികളും എത്രയും പെട്ടെന്ന് റദ്ദാക്കി ജനങ്ങളുടെ ആശങ്കയ്ക്ക് അറുതി വരുത്തണമെന്നും അദ്ദേഹം മുഖ്യമന്ത്രിയോട് ആവശ്യപ്പെട്ടു.