ഈരാറ്റുപേട്ട: മാപ്പിള കലകളുടെ വളര്‍ച്ചക്കും ഉന്നമനത്തിനും പ്രോത്സാഹനത്തിനും വേണ്ടി പ്രവര്‍ത്തിക്കുന്നവര്‍ക്ക് ഇശല്‍മാല മാപ്പിളകലാ സാഹിത്യവേദി വര്‍ഷംതോറും നല്‍കിവരാറുള്ള ടി. ഉബൈദ്, കെ.എം അഹ്മദ് പുരസ്‌കാരങ്ങള്‍ പ്രഖ്യാപിച്ചു. 2019 ലെ കെ.എം അഹ്മദ് പുരസ്‌കാരം പ്രശസ്ത ഗായകനും സംഗീത സംവിധായകനും എഴുത്തുകാരനും സംഘാടകനുമായ വി.എം കുട്ടിക്കും ടി. ഉബൈദ് പുരസ്‌കാരം പ്രമുഖ കലാ സാംസ്‌കാരിക പ്രവര്‍ത്തകനും കവിയുമായ യഹിയ തളങ്കരക്കും സമ്മാനിക്കും.
25ന് എടപ്പാള്‍ എം.എച്ച് സ്‌കൂളില്‍ നടക്കുന്ന ചടങ്ങില്‍ പുരസ്‌കാരം സമ്മാനിക്കുമെന്ന് സംഘാടകരായ നെല്ലറ ഷംസുദ്ദീന്‍, തല്ഹത്ത് ഫോറം ഗ്രൂപ്പ് , താഹിര്‍ ഇസ്മാഈല്‍ ചങ്ങരംകുളം, സുബൈര്‍ വെള്ളിയോട്, സിറാജ് വട്ടക്കയം എന്നിവര്‍ അറിയിച്ചു. റഹ്മാന്‍ താഴലങ്ങാടി, കെ. മുഹമ്മദ് ഈസ്സ ( ഖത്തര്‍), ഹസ്സന്‍ നെടിയനാട്, ഫൈസല്‍ എളേറ്റില്‍ എന്നിവരടങ്ങിയ ജൂറിയാണ് അവാര്‍ഡ് നിര്‍ണയം നടത്തിയത്.