ലോര്‍ഡ്‌സ്: വീണ്ടും മഴ കളിച്ചതോടെ ആഷസ് രണ്ടാം ടെസ്റ്റിലെ മൂന്നാം ദിവസവും ആരാധകര്‍ക്ക് നിരാശ. ഇന്നലെ മൂന്ന് തവണയാണ് കളിക്കിടെ മഴ വില്ലനായെത്തിയത്. ഇതോടെ നനഞ്ഞ പിച്ചില്‍ റണ്‍സ് കണ്ടെത്താന്‍ വിയര്‍ത്ത ഓസീസിന് വിക്കറ്റുകളും തുടരെ നഷ്ടമായി.
മഴക്കളിയെ തുടര്‍ന്ന് നേരത്തേ മത്സരം അവസാനിപ്പിച്ചപ്പോള്‍ ഓസീസിന്റെ ആദ്യ ഇന്നിങ്‌സ് നാലു വിക്കറ്റിന് 80 റണ്‍സെന്ന നിലയിലേക്ക് കൂപ്പുകുത്തി. 36 റണ്‍സെടുത്ത ഉസ്മാന്‍ ഖവാജയാണ് ഓസീസിന്റെ ടോപ് സ്‌കോറര്‍. ഇംഗ്ലണ്ടിന് വേണ്ടി സ്റ്റുവര്‍ട്ട് ബ്രോഡ് രണ്ടും ജോഫ്ര ആര്‍ച്ചര്‍, ക്രിസ് വോക്‌സ് എന്നിവര്‍ ഓരോ വിക്കറ്റും വീഴ്ത്തി. 13 റണ്‍സുമായി സ്റ്റീവ് സ്മിത്തും റണ്‍സൊന്നുമെടുക്കാതെ മാത്യു വെയ്ഡുമാണ് ക്രീസില്‍.
നേരത്തേ ടോസ് നേടിയ ആസ്‌ത്രേലിയ ഇംഗ്ലണ്ടിനെ ബാറ്റിങിനയച്ചു.
ആദ്യ ഇന്നിങ്‌സില്‍ ഇംഗ്ലണ്ട് 258ല്‍ പുറത്തായി. ഓസീസിനായി നഥാന്‍ ലിയോണ്‍, ഹെയ്‌സില്‍വുഡ്, പാറ്റ് കമ്മിന്‍സ് എന്നിവര്‍ മൂന്ന് വീതം വിക്കറ്റുകള്‍ വീഴ്ത്തി. ഇംഗ്ലണ്ടിനായി ജോ ബേണ്‍സ് 53ഉം ജോണി ബൈറിസ്റ്റോ 52ഉം റണ്‍സെടുത്തു.