ആലപ്പുഴ: ചേര്‍ത്തലയിലെ ദുരിതാശ്വാസ ക്യാംപിലെ പണപ്പിരിവ് നടത്തിയ സി.പി.എം പാര്‍ട്ടി നേതാവിനെതിരേ ഫയല്‍ചെയ്ത കേസ് പിന്‍വലിക്കും. ഇതുസംബന്ധിച്ച് റവന്യു പ്രിന്‍സിപ്പല്‍ സെക്രട്ടറി ആലപ്പുഴ ജില്ലാ കലക്ടര്‍ക്ക് നിര്‍ദേശം നല്‍കി. സി.പി.എം പ്രാദേശിക നേതാവ് ഓമനക്കുട്ടനാണ് ക്യാപില്‍ പിരിവുമായി എത്തിയിരുന്നത്. പണം പിരിച്ചത് നല്ല ഉദ്ദേശത്തോടെയാണെന്നാണ് പ്രിന്‍സിപ്പല്‍ സെക്രട്ടറി വി. വേണു ഫേസ്ബുക്കില്‍ നല്‍കുന്ന വിശദീകരണം. അതേ സമയം സംഭവത്തിന്റെ പേരില്‍ ഓമനക്കുട്ടനെ പാര്‍ട്ടിയില്‍ നിന്നും സസ്പെന്‍ഡ് ചെയ്തിരുന്നു.
കഴിഞ്ഞ തവണയും ഇത്തരത്തിലുള്ള പണപ്പിരിവ് നടത്തിയതിന്റെ പേരില്‍ വിവാദം ഉണ്ടായതിനെ തുടര്‍ന്ന് ഇത്തരം നടപടികള്‍ ക്യാംപില്‍ ഉണ്ടാവരുതെന്ന് മുഖ്യമന്ത്രിയുടെ പ്രത്യേക നിര്‍ദേശം നിലനില്‍ക്കെയായിരുന്നു പ്രാദേശിക നേതാവിന്റെ ക്യാംപിലെ പണപ്പിരിവ്. കുറ്റം തെളിഞ്ഞാല്‍ കര്‍ശന നടപടിയെടുക്കുമെന്ന് സി.പി.എം ജില്ലാ നേതൃത്വവും അറിയിച്ചിരുന്നു.

ഇദ്ദേഹം പിരിവ് നടത്തിയെന്നും സമ്മതിച്ചിരുന്നു. ഉദ്യേഗസ്ഥര്‍ പണം നല്‍കാത്തതിനാലാണ് പിരിവ് നടത്തിയതെന്നും ക്യാംപിലെ ആവശ്യങ്ങള്‍ക്ക് വേണ്ടിയാണെന്നുമായിരുന്നു ഓമനക്കുട്ടന്റെ വിശദീകരണം. ഓമനക്കുട്ടന്റെ പേരിലുള്ള കേസ് സര്‍ക്കാര്‍ തന്നെ പിന്‍വലിച്ച സാഹചര്യത്തില്‍ പാര്‍ട്ടിയില്‍ നിന്നുള്ള പുറത്താക്കല്‍ നടപടി മരവിപ്പിക്കാന്‍ തന്നെയാകും തീരുമാനമെന്നറിയുന്നു. എന്തായാലും അതറിയാനാണ് ഇനി ആളുകള്‍ കാത്തിരിക്കുന്നത്.