കുറ്റ്യാടി: കാലവര്‍ഷത്തിന്റെ വരവറിയിച്ച് ഇന്നലെ പെയ്ത കനത്തമഴയില്‍ കുറ്റ്യാടിയിലെ കടകളില്‍ വെള്ളം കയറി. മരുതോങ്കര റോഡ്, വടകര റോഡ്, പുതിയ ബസ് സ്റ്റാന്റ് തുടങ്ങിയ സ്ഥലങ്ങളില്‍ വന്‍ വെള്ളക്കെട്ടാണ് അനുഭവപ്പെട്ടത്.
ഓവു ചാലുകളില്‍ അടിഞ്ഞുകൂടിയ പ്ലാസ്റ്റിക് മാലിന്യങ്ങള്‍ വെള്ളത്തിന്റെ ഒഴുക്ക് തടസ്സപ്പെടുത്തിയതാണ് മഴ വെള്ളം കടകളിലേക്ക് കയറാന്‍ ഇടയാക്കിയത്. മലിന ജലം കടകളിലേക്കും റോഡുകളിലേക്കും കയറിയതോടെ കച്ചവടക്കാരും കാല്‍നട യാത്രക്കാരും ദുരിതത്തിലായി.
കനത്ത മഴയില്‍ പുതിയ സ്റ്റാന്റ് പൂര്‍ണമായും വെള്ളത്തിലായി. വരും ദിവസങ്ങളില്‍ മഴ ശക്തമാവുന്നതോടെ ടൗണിലെ ജനജീവിതം കൂടുതല്‍ ദുസ്സഹമാവുന്ന സ്ഥിതിയാണ്. ഇതിനിടെ ടൗണിലെ ഓവു ചാലുകള്‍ക്ക് മുകളിലെ സ്ലാബുകള്‍ പൊട്ടിപ്പൊളിഞ്ഞതോടെ കാല്‍നട യാത്ര ദുസ്സഹമായിരിക്കുന്ന അവസ്ഥയാണ്.