മുക്കം: കഴിഞ്ഞ രണ്ടു മാസത്തോളമായി മുക്കത്തും പരിസര പ്രദേശങ്ങളിലും തുടര്‍ച്ചയായി ഉണ്ടാകുന്ന മോഷണത്തിന് ഇനിയും അറുതിയായില്ല. ഓമശ്ശേരിക്കടുത്ത് പൂളപൊയില്‍ ഭാഗത്താണ് കഴിഞ്ഞദിവസം മോഷണം നടന്നത്.
മൂന്നു വീടുകളില്‍ മോഷണവും ഒരു വീട്ടില്‍ മോഷണശ്രമവും നടന്നു. പൂളപൊയില്‍ പടിഞ്ഞാറു വീട്ടില്‍ കരുണാകരന്‍ നായരുടെ വീട്ടില്‍ കയറിയ മോഷ്ടാക്കള്‍ 22 പവന്‍ സ്വര്‍ണാഭരണവും 5000 രൂപയും അപഹരിച്ചു. വീട്ടിലെ അലമാരയില്‍ സൂക്ഷിച്ച സ്വര്‍ണവും പണവുമാണ് നഷ്ടപ്പെട്ടത്. അടുക്കള വാതില്‍ പൊളിച്ചാണ് മോഷ്ടാക്കള്‍ അകത്തു കടന്നത്. തൊട്ടടുത്ത വരിക്കാലില്‍ സാറയുടെ വീട്ടില്‍ കയറിയ മോഷ്ടാക്കള്‍ 5000 രൂപയും ജമീല കുന്നുമ്മലിന്റെ വീട്ടില്‍ നിന്ന് 4000 രൂപയും മോഷ്ടിച്ചു. ഇടിവെട്ടിപ്പാറ ഷിഹാബുദ്ദീന്റെ വീട്ടിലാണ് മോഷണശ്രമം നടന്നത്. ഇവിടെ അലമാരയിലെ സാധനങ്ങള്‍ വാരിവലിച്ചിട്ടെങ്കിലും മോഷ്ടാക്കള്‍ക്ക് ഒന്നും ലഭിച്ചില്ല. പുലര്‍ച്ചെ രണ്ടിനും നാലിനും ഇടക്കാണ് മോഷണം നടന്നതെന്നാണ് നിഗമനം. മുക്കം പൊലിസും വിരലടയാള വിദഗ്ധരും സ്ഥലത്തെത്തി പരിശോധന നടത്തി.
ഒരാഴ്ച മുന്‍പ് അഗസ്ത്യന്‍മുഴിയിലെ മൂന്നു വീടുകളിലായി നടന്ന മോഷണത്തില്‍ 10 പവനിലധികം നഷ്ടപ്പെട്ടിരുന്നു. മേഖലയില്‍ തുടര്‍ച്ചയായി നടക്കുന്ന മോഷണങ്ങള്‍ തടയാന്‍ നാട്ടുകാര്‍ സ്‌ക്വാഡ് രൂപീകരിച്ചിരുന്നു. പൊലിസ് പട്രോളിങ് കാര്യക്ഷമമാക്കണമെന്ന് നാട്ടുകാര്‍ ആവശ്യപ്പെട്ടു.