തിരൂര്‍: ട്രിപ്പ് പോകാന്‍ വിസമ്മതിച്ചതിന് ഓട്ടോ ഡ്രൈവറെ കുത്തിക്കൊന്നു. തിരൂര്‍ പറവണ്ണയിലാണ് സംഭവം. പറവണ്ണ പുത്തങ്ങാടി കളരിക്കല്‍ കുഞ്ഞിമുഹമ്മദിന്റെ മകന്‍ മുഹമ്മദ് യാസീന്‍ (40) ആണ് കൊല്ലപ്പെട്ടത്. പറവണ്ണ അങ്ങാടിയില്‍ ഇന്നലെ രാത്രി ഏഴരയോടെയാണ് സംഭവം.
നെഞ്ചിലും മുതുകിലും കുത്തേറ്റ യാസീനെ ഗുരുതരാവസ്ഥയില്‍ കോട്ടക്കല്‍ മിംസ് ആശുപത്രിയിലെത്തിച്ചെങ്കിലും മരണപ്പെടുകയായിരുന്നു. മദ്യലഹരിയില്‍ യാസീനെ കുത്തി വീഴ്ത്തിയ പറവണ്ണ പള്ളത്ത് ആദം പിന്നീട് രക്ഷപ്പെട്ടു. പരസ്യമദ്യപാനം ചോദ്യംചെയ്തതാണ് ആക്രമണത്തിലേക്ക് നയിച്ചതെന്നും സൂചനയുണ്ട്. പ്രതിക്കായി പൊലിസ് അന്വേഷണം ഊര്‍ജിതമാക്കി.
ആദമിന് സ്വഭാവ ദൂഷ്യങ്ങളുള്ളതിനാല്‍ യാസീന്‍ ട്രിപ്പ് പോകാന്‍ വിസമ്മതിച്ചതിനെ തുടര്‍ന്നുണ്ടായ വാക്കുതര്‍ക്കത്തിനിടെ ആദം കത്തിയെടുത്ത് കുത്തുകയായിരുന്നു.
യാസീനെ നാട്ടുകാര്‍ ആശുപത്രിയിലേക്ക് കൊണ്ടുപോയതിനുശേഷം ഓട്ടോയും അടിച്ചുതകര്‍ത്താണ് ആദം രക്ഷപ്പെട്ടത്. ഓട്ടോ തകര്‍ക്കുന്നതിനിടെ ഇയാള്‍ക്ക് പരുക്കേറ്റിട്ടുണ്ട്. ഫാസിലയാണ് മുഹമ്മദ് യാസീന്റെ ഭാര്യ. മക്കള്‍: അന്‍സല്‍, ഷിബിലി, നൗഫിദ, ഷഹല. മൃതദേഹം കോട്ടക്കല്‍ മിംസ് ആശുപത്രിയില്‍ ഇന്‍ക്വസ്റ്റിന് ശേഷം കോഴിക്കോട് മെഡിക്കല്‍ കോളജ് ആശുപത്രി മോര്‍ച്ചറിയിലേക്ക് മാറ്റും.