കൊച്ചി: ആക്രമിക്കപ്പെട്ട നടിയുടെ വെളിപ്പെടുത്തല്‍ ശരിവയ്ക്കുന്ന തരത്തില്‍ നടന്‍ സിദ്ദിഖ് അന്വേഷണ ഉദ്യോഗസ്ഥര്‍ക്ക് നല്‍കിയ മൊഴി പുറത്ത്. ദിലീപ് കാരണം ആക്രമിക്കപ്പെട്ട നടിക്ക് അവസരങ്ങള്‍ നഷ്ടപ്പെട്ടെന്ന് തനിക്ക് അറിയാമായിരുന്നുവെന്ന സിദ്ദിഖിന്റെ മൊഴിയാണ് പുറത്തായത്.
നടിയും ദിലീപും തമ്മില്‍ നല്ല ബന്ധത്തിലായിരുന്നില്ല. തന്റെ അവസരങ്ങള്‍ ദിലീപ് ഇല്ലാതാക്കുന്നുവെന്ന് നടി പരാതി പറഞ്ഞയുടന്‍ ദിലീപിനോട് വിഷയം സംസാരിച്ചിരുന്നു. എന്നാല്‍ തന്റെ വ്യക്തിപരമായ കാര്യങ്ങളില്‍ ഇടപെടരുതെന്ന് ദിലീപ് ആവശ്യപ്പെട്ടിരുന്നതായും മൊഴിയില്‍ വ്യക്തമാക്കുന്നു.
അതേസമയം സിദ്ദിഖ് കഴിഞ്ഞ ദിവസം നടത്തിയ വാര്‍ത്താസമ്മേളനത്തില്‍ നടിയുടെ അവസരങ്ങള്‍ ഇല്ലാതാക്കിയതിനെപ്പറ്റിയുള്ള ചോദ്യത്തിന് മൊഴിക്ക് വിരുദ്ധമായ മറുപടിയാണ് നല്‍കിയത്.
അവസരങ്ങള്‍ ഇല്ലാതാക്കിയെന്ന് ഏത് സംവിധായകനാണ് പറഞ്ഞതെന്നായിരുന്നു മറുചോദ്യം. സംവിധായകന്‍ ആരെന്ന് വെളിപ്പെടുത്തിയാല്‍ അക്കാര്യം അന്വേഷിക്കാമെന്നും അദ്ദേഹം വെളിപ്പെടുത്തിയിരുന്നു.ഹോട്ടല്‍ അബാദ്പ്ലാസയില്‍ നടന്ന സ്റ്റേജ് ഷോയ്ക്കിടെ നടന്ന തര്‍ക്കത്തിലും താന്‍ ഇടപെട്ടതായി പൊലിസിനോട് സിദ്ദിഖ് സമ്മതിച്ചിട്ടുണ്ട്. എന്നാല്‍, ഇത് സംബന്ധിച്ചുള്ള മാധ്യമപ്രവര്‍ത്തകരുടെ ചോദ്യത്തിനും സിദ്ദിഖ് ഒഴിഞ്ഞുമാറുകയായിരുന്നു. കോടതിയുടെ പരിഗണനയില്‍ ഇരിക്കുന്ന കാര്യമായതിനാല്‍ ഇത് സംബന്ധിച്ച ചോദ്യങ്ങള്‍ക്ക് മറുപടിപറയാന്‍ ബുദ്ധിമുട്ടുണ്ടെന്നായിരുന്നു സിദ്ദിഖിന്റെ മറുപടി.
ഇതൊക്കെ എല്ലാവരും മറന്നുകഴിഞ്ഞ കാര്യങ്ങളാണെന്നും സിദ്ദിഖ് പറഞ്ഞിരുന്നു.