ശ്രീനഗര്‍: ജമ്മുകശ്മിരില്‍ ബന്ദിപ്പോറയില്‍ സി.ആര്‍.പി.എഫ് ക്യാംപ് ആക്രമിക്കാനുള്ള ഭീകരരുടെ ശ്രമം തകര്‍ത്തു. സൈനിക നടപടിക്കിടയില്‍ നാല് ഭീകരരെ കൊലപ്പെടുത്തിയതായി സി.ആര്‍.പി.എഫ് വക്താവ് അറിയിച്ചു.
ഭീകര സംഘത്തിലെ ആത്മഹത്യ വിഭാഗത്തിലുള്ളവരാണ് ക്യാംപ് ആക്രമിക്കാനെത്തിയതെന്ന് സൈന്യം അറിയിച്ചു. ഇന്നലെ പുലര്‍ച്ചെയായിരുന്നു ആക്രമണ ശ്രമം നടന്നത്.
ബന്ദിപ്പോറയിലെ 45ാം ബറ്റാലിയന്‍ സി.ആര്‍.പി.എഫ് ക്യാംപിനുനേരെ പുലര്‍ച്ചെ 4.10നായിരുന്നു ഭീകരര്‍ ആക്രമണം നടത്തിയത്. ക്യാംപിന്റെ പ്രവേശന കവാടത്തിലേക്ക് വെടിയുതിര്‍ത്തതോടെ സി.ആര്‍.പി.എഫ് ജവാന്‍മാന്‍ ശക്തമായ തിരിച്ചടിക്കൊരുങ്ങി. കൂടുതല്‍ ജവാന്‍മാരെത്തി പ്രദേശം വളഞ്ഞാണ് പ്രത്യാക്രമണം തുടങ്ങിയത്. ജവാന്‍മാരുടെ തിരിച്ചടിയില്‍ നാല് ഭീകരരെ വധിച്ചു. ഇവരില്‍ നിന്ന് അത്യാധുനിക ആയുധങ്ങള്‍ കണ്ടെടുത്തതായി സി.ആര്‍.പി.എഫ് വക്താവ് അറിയിച്ചു.