മാനന്തവാടി: ബിഷപ്പ് ഫ്രാങ്കോയ്‌ക്കെതിരേയുള്ള കന്യാസ്ത്രീകളുടെ സമരത്തില്‍ പങ്കെടുത്ത ദ്വാരക ഹൈസ്‌കൂള്‍ അധ്യാപിക സിസ്റ്റര്‍ ലൂസിയെ മഠത്തില്‍ നിന്നും കൂട്ടിക്കൊണ്ട് പോകണമെന്നാവശ്യപ്പെട്ട് ലൂസിയുടെ മാതാവ് റോസമ്മ സ്‌കറിയക്ക് എഫ്.സി.സി മാനന്തവാടി പ്രൊവിന്‍ഷ്യല്‍ സുപ്പീരിയര്‍ കത്ത് നല്‍കി. 2015 മുതല്‍ തുടര്‍ച്ചയായി വിശ്വാസ ലംഘനങ്ങള്‍ ശ്രദ്ധയില്‍പ്പെടുത്തിയിട്ടും ജീവിത ശൈലിയില്‍ മാറ്റംവരുത്താത്തതിനെ തുടര്‍ന്നാണ് ലൂസിയെ സന്യാസ സമൂഹത്തില്‍നിന്നും പുറത്താക്കിയ തെന്നും കത്തില്‍ പറയുന്നു.
പുറത്താക്കിയ നടപടിക്കെതിരേ വത്തിക്കാനിലെ പൗരസ്ത്യ തിരുസംഘത്തിന് പത്തുദിവസത്തിനകം അപേക്ഷ നല്‍കാമെന്നും ഇന്നലെ അവസാനിക്കുന്ന അവധിക്കുള്ളില്‍ അപേക്ഷ നല്‍കിയില്ലെങ്കില്‍ മഠത്തില്‍നിന്നും കൂട്ടിക്കൊണ്ട് പോകണമെന്നുമാണ് കത്തിലൂടെ ആവശ്യപ്പെട്ടിരിക്കുന്നത്.
കുടുംബസ്വത്തില്‍ ലൂസിയുടെ വിഹിതം സഭക്ക് നല്‍കാത്തതിനാല്‍ അത് കൈവശമുണ്ടാകുമെന്നും 2017 ഡിസംബര്‍ മുതലുള്ള ലൂസിയുടെ ശമ്പളം (പ്രതിമാസം 50,000 വീതം) ഇപ്പോള്‍ പത്തുലക്ഷത്തോളം രൂപയും പെന്‍ഷന്‍ പറ്റുമ്പോഴുള്ള ആനുകൂല്യങ്ങളും പെന്‍ഷനുമെല്ലാം ലൂസിക്ക് സാമ്പത്തിക സുരക്ഷ നല്‍കുന്നതായി സഭ കരുതുന്നതായും കത്തിലുണ്ട്.
എന്നാല്‍ മഠം വിട്ടിറങ്ങില്ലെന്നും വത്തിക്കാനിലേക്ക് അപ്പീല്‍ അയച്ചതായും സിസ്റ്റര്‍ ലൂസി മാധ്യമങ്ങളോട് പ്രതികരിച്ചു. തന്റെ ഭാഗത്ത് തെറ്റില്ലെന്നും സന്യാസി സഭയില്‍ തുടരണമെന്നും അവര്‍ പറഞ്ഞു.