മഡ്ഗാവ്: ഇന്ത്യന്‍ സൂപ്പര്‍ ലീഗ് ടീം എഫ്.സി ഗോവ സ്പാനിഷ് കോച്ച് സെര്‍ജിയോ ലൊബേറയെ പുതിയ പരിശീലകനായി നിയമിച്ചു. മൂന്ന് സീസണുകളില്‍ ടീമിനെ പരിശീലിപ്പിച്ച ബ്രസീല്‍ ഇതിഹാസം സീക്കോയ്ക്ക് പകരമാണ് ലൊബേറയുടെ നിയമനം.
രണ്ട് വര്‍ഷത്തെ കരാറിലാണ് 40കാരനായ സ്പാനിഷ് കോച്ച് ടീമിന്റെ പരിശീലക സ്ഥാനമേല്‍ക്കുന്നത്. ജൂലൈയില്‍ അദ്ദേഹം സ്ഥാനമേറ്റെടുക്കും.
ബാഴ്‌സലോണ യൂത്ത് ടീമിനേയും ബാഴ്‌സലോണ സി ടീമിനേയും പരിശീലിപ്പിച്ചിട്ടുള്ള ലൊബേറ 2012 മുതല്‍ 2014 വരെ ലാസ് പല്‍മാസിനേയും പരിശീലിപ്പിച്ചിട്ടുണ്ട്. കഴിഞ്ഞ സീസണ്‍ അവസാനിച്ചപ്പോള്‍ സീക്കോ പരിശീലക സ്ഥാനമൊഴിയുന്നതായി വ്യക്തമാക്കിയിരുന്നു. ഗോവയ്ക്കായി മികച്ച ഫലങ്ങള്‍ സൃഷ്ടിക്കാനാകുമെന്ന് ലൊബേറ പ്രതീക്ഷ പ്രകടിപ്പിച്ചു.