വടക്കാഞ്ചേരി: ട്രെയിന്‍ സര്‍വിസുകള്‍ താറുമാറാക്കി പാളത്തില്‍ അറ്റകുറ്റപണികള്‍ ഇടതടവില്ലാതെ പുരോഗമിക്കുമ്പോഴും ദുരന്തമുഖം തീര്‍ത്ത് പാളങ്ങള്‍.
വടക്കാഞ്ചേരി റെയില്‍വേ സ്റ്റേഷനോടു തൊട്ട് റെയില്‍ പാളം കാലപ്പഴക്കം മൂലം അതീവ ദുര്‍ബലാവസ്ഥയിലായിട്ടും അധികൃതര്‍ ചെറുവിരലനക്കുന്നില്ല. പാളമാകെ തേഞ്ഞ് ഇല്ലാതായി വിള്ളല്‍ വീണ നിലയിലാണ്. ഏതു നിമിഷവും രണ്ടായി മുറിയുമെന്ന അവസ്ഥയിലാണ്. റെയില്‍വേ ഉദ്യോഗസ്ഥര്‍ നിരന്തരം കടന്നു പോകുന്ന സ്ഥലത്താണ് സുരക്ഷയൊട്ടുമില്ലാത്ത പാളത്തിന്റെ നീണ്ട് നിവര്‍ന്നുള്ള കിടപ്പ്. മീറ്ററുകള്‍ ദൂരം പാളം കുണ്ടും കുഴിയുമായി കിടക്കുകയാണ്. അപകടങ്ങളും ദുരന്തങ്ങളും സംഭവിക്കുമ്പോള്‍ മാത്രം എന്തെങ്കിലും ചെയ്യുക എന്ന റെയില്‍വേയുടെ സ്ഥിരം പരിപാടി വടക്കാഞ്ചേരിയിലും ആവര്‍ത്തിക്കുമ്പോള്‍ പാളത്തിന്റെ അവസ്ഥയോര്‍ത്ത് ഏറെ ആശങ്കയിലാണ് ജനങ്ങളും യാത്രക്കാരും. തൃശൂര്‍ ഭാഗത്തേയ്ക്കു വരുന്ന ട്രെയിനുകള്‍ ഒന്നാം പാളത്തിലേക്കു പ്രവേശിക്കുന്ന ഭാഗമായതിനാല്‍ ഇവിടെ ട്രെയിനുകള്‍ക്ക് വേഗത കുറവായിരിയ്ക്കുമെന്നത് മാത്രമാണ് ഏക ആശ്വാസം.