കുന്ദമംഗലം: കാരന്തൂര്‍ മര്‍കസ് ഇന്‍സ്റ്റിറ്റ്യൂട്ട് ഓഫ് എന്‍ജിനിയറിങില്‍ നടന്ന വിദ്യാഭ്യാസ തട്ടിപ്പിനിനെതിരേ പ്രക്ഷോഭം നടത്തുന്ന സമര സമിതി ഭാരവാഹികള്‍ മുഖ്യമന്ത്രി പിണറായി വിജയനെ കണ്ടു. വിദ്യാര്‍ഥികള്‍ തട്ടിപ്പിനിരയായ സംഭവം ശ്രദ്ധയില്‍പെട്ടിട്ടുണ്ടെന്നും സംഭവത്തില്‍ അനുഭാവപൂര്‍വ്വം നടപടി കൈകൊള്ളുമെന്നും മുഖ്യമന്ത്രി ഉറപ്പു നല്‍കിയതായി വിദ്യാര്‍ഥി പ്രതിനിധി നൗഫല്‍ അറിയിച്ചു. സമരസമിതി ചെയര്‍മാന്‍ വിശ്വനാഥന്‍, ജാസിര്‍ എന്നിവരും പ്രതിനിധി സംഘത്തിലുണ്ടായിരുന്നു.
അതേസമയം, സമരം ഒത്തുതീര്‍പ്പാക്കുന്നതിന് വിദ്യാഭ്യാസ മന്ത്രി വിദ്യാര്‍ഥികളുടെ യോഗം വിളിക്കുമെന്ന് പറഞ്ഞിരുന്നെങ്കിലും ഇതുവരെ നടപടിയൊന്നുമായില്ല. കോഴ്‌സുകളുടെ അംഗീകാരം സംബന്ധിച്ച്  വിദഗ്ധ സമിതിയുടെ റിപ്പോര്‍ട്ട് കലക്ടര്‍ യു.വി ജോസ് സര്‍ക്കാരിനു കൈമാറിയിട്ടുണ്ട്. കോഴ്‌സിന് അംഗീകാരമില്ലെന്ന് സമിതി കണ്ടെത്തിയിരുന്നു. വിദ്യാര്‍ഥികളുടെ ആവശ്യം ന്യായമാണെന്ന് ഹൈക്കോടതി നിരീക്ഷണം നടത്തുകയും ചെയ്തിരുന്നു.