ജിദ്ദ: വേനല്‍ക്കാലത്ത് ശക്തമായ ചൂടില്‍ ഉച്ചസമയത്ത് തുറസ്സായ സ്ഥലത്ത് ജോലി ചെയ്യുന്നതിന് സഊദി തൊഴില്‍, സോഷ്യല്‍ ഡെവലപ്‌മെന്റ് മന്ത്രാലയം വിലക്ക് ഏര്‍പ്പെടുത്തി. ഉച്ചയ്ക്ക് 12 മുതല്‍ വൈകീട്ട് മൂന്നു വരെയുള്ള ചൂടേറിയ സമയത്താണ് നിരോധനം ഏര്‍പ്പെടുത്തിയിരിക്കുന്നത്. ജൂണ്‍ 15 മുതല്‍ മൂന്ന് മാസത്തേക്കാണ് നിരോധനം. എല്ലാ കമ്പനികളും ഈ കാര്യത്തില്‍ ശ്രദ്ധ ചെലുത്താന്‍ മന്ത്രാലം പ്രത്യേക നിര്‍ദേശം നല്‍കിയിട്ടുണ്ട്.

സെപ്തംബര്‍ 15 വരെ നിരോധനം തുടരും. സ്വകാര്യമേഖലയിലെ ജീവനക്കാരുടെ സുരക്ഷ ഉറപ്പുവരുത്തുകയാണ് മന്ത്രാലയം ലക്ഷ്യം വയ്ക്കുന്നത്. സുരക്ഷ, തൊഴില്‍ സ്ഥലത്തെ ആരോഗ്യ പ്രശ്‌നങ്ങള്‍ എന്നിവയില്‍ നിന്നും തൊഴിലാളികളെ സംരക്ഷിക്കേണ്ട മന്ത്രാലയത്തിന്റെ ഉത്തരവാദിത്വമാണ് ഇവിടെ നിറവേറ്റപ്പെടുന്നത്. പുതിയ തീരുമാനവുമായി യോജിക്കുന്ന രീതിയില്‍ തൊഴില്‍ സമയം തരപ്പെടുത്താന്‍ മന്ത്രാലയം വക്താവ് ഖാലിദ് അബ അല്‍ ഖൈല്‍ തൊഴില്‍ ദായകര്‍ക്ക് നിര്‍ദേശം നല്‍കി.

തൊഴില്‍ സ്ഥലങ്ങളുമായി ബന്ധപ്പെട്ടുണ്ടാകുന്ന അപകടങ്ങള്‍ കഴിയുന്നത്ര കുറയ്ക്കാനാണ് മന്ത്രാലയം ലക്ഷ്യം വയ്ക്കുന്നത്. അതേസമയം ചില പ്രവിശ്യകള്‍ പുതിയ നിര്‍ദേശത്തില്‍ നിന്നും ഒഴിവാക്കിയിട്ടുണ്ട്. ഇവിടെ താപനില കുറവായതിനാലാണിത്. മന്ത്രാലയം വിവിധ ഗവര്‍ണറേറ്റുകളുമായി ബന്ധപ്പെട്ട് അവിടത്തെ താപനില താരതമ്യം ചെയ്യുമെന്നും മന്ത്രാലയം അറിയിച്ചു.