നിലമ്പൂര്‍: വിദ്യാര്‍ഥികള്‍ക്കും യുവാക്കള്‍ക്കും കഞ്ചാവ് പൊതികള്‍ നല്‍കുന്നയാള്‍ പൊലിസ് പിടിയിലായി. മമ്പാട് ഓടായിക്കല്‍ വാഴയില്‍ വീട് ഷൗക്കത്തിനെ (അച്ചായന്‍-45)യാണ് കഞ്ചാവു സഹിതം നിലമ്പൂര്‍ സി.ഐ കെ.എം ബിജുവും സംഘവും അറസ്റ്റ് ചെയ്തത്. മമ്പാട് കേന്ദ്രീകരിച്ചാണ് കഞ്ചാവ് കച്ചവടം.
25 പൊതികളിലായി 80 ഗ്രാം കഞ്ചാവ് ഇയാളില്‍നിന്നു പിടികൂടി. തോര്‍ത്ത്മുണ്ടില്‍ പൊതിഞ്ഞ് കൈയില്‍ ചുറ്റികെട്ടിയ നിലയിലായിരുന്നു കഞ്ചാവ് പൊതികള്‍ ഒളിപ്പിച്ചിരുന്നത്. ഇയാള്‍ സ്ഥിരമായി വിദ്യാര്‍ഥികള്‍ക്ക് കഞ്ചാവ് നല്‍കുന്നയാളാണെന്ന് പൊലിസ് പറഞ്ഞു. തിങ്കളാഴ്ച മമ്പാട് നടുവക്കാടില്‍ കഞ്ചാവ് വലിക്കുന്നതിനിടെ മൂന്ന് വിദ്യാര്‍ഥികള്‍ പൊലിസിന്റെ പിടിയിലായിരുന്നു. ഇവരെ ചോദ്യം ചെയ്തതോടെയാണ് ഇയാള്‍ വലയിലായത്. ഇയാളുടെ മൊബൈല്‍ ഫോണ്‍ പരിശോധിച്ചതില്‍നിന്നു ഇരകളെ കണ്ടെത്തി. ഇതില്‍ വിദ്യാര്‍ഥികളുമുണ്ടായിരുന്നു. ഇവരെ സ്റ്റേഷനില്‍ വിളിച്ചു വരുത്തി താക്കീത് ചെയ്ത് വിട്ടയച്ചു. ഷൗക്കത്തിനെതിരെ നിലമ്പൂര്‍ എക്‌സൈസില്‍ നേരത്തെ നാലു കേസുകളുണ്ട്. മഞ്ചേരി, വണ്ടൂര്‍, എക്‌സൈസ് ഓഫിസുകളില്‍ മൂന്നുവീതം കഞ്ചാവ് കേസുണ്ട്. എക്‌സൈസ് കേസില്‍ ജയിലില്‍ നിന്ന് ഒരാഴ് മുന്‍പാണ് ജാമ്യത്തിലിറങ്ങി വീണ്ടും കഞ്ചാവ് വില്‍പന തുടങ്ങിയത്. കോടതിയില്‍ ഹാജരാക്കി.