തിരൂര്‍: അമ്മത്തൊട്ടിലിനരികെ ഒരു ദിവസം മാത്രം പ്രായമായ ചോരക്കുഞ്ഞിനെ ഉപേക്ഷിച്ചു. തിരൂര്‍ പൊറ്റത്തെപ്പടിയിലെ ഡോ. കുമാരി സുകുമാരന്റെ വീട്ടിന് മുന്നിലൊരുക്കിയ അമ്മത്തൊട്ടിലിന് അരികെനിന്ന് ഇന്നലെ പുലര്‍ച്ചെയാണ് പെണ്‍കുഞ്ഞിനെ ഉപേക്ഷിച്ച നിലയില്‍ കണ്ടെത്തിയത്.
കുഞ്ഞിന്റെ കരച്ചില്‍ കേട്ട് കുമാരി സുകുമാരനും വീട്ടുകാരുമെത്തി കുട്ടിയെ വീട്ടിലേക്ക് കൊണ്ടുപോകുകയും പ്രാഥമിക ശുശ്രൂഷ നല്‍കുകയുമായിരുന്നു. പിന്നീട് തിരൂര്‍ പൊലിസെത്തി കുട്ടിയെ തിരൂര്‍ ജില്ലാ ആശുപത്രിയിലേക്ക് മാറ്റി. കുട്ടിയെ ഇനി ശിശുക്ഷേമ സമിതിയ്ക്ക് കൈമാറും.
അമ്മത്തൊട്ടിലില്‍ നിന്ന് ഇതിനകം പതിനൊന്നോളം കുട്ടികളെയാണ് ഉപേക്ഷിക്കപ്പെട്ട നിലയില്‍ ലഭിച്ചതെന്ന് റോട്ടറി ക്ലബ് പ്രസിഡന്റായിരുന്ന ഡോ. കുമാരി സുകുമാരന്‍ പറഞ്ഞു.