കൊളംബോ: ശ്രീലങ്കയിലെ 26 വര്‍ഷം നീണ്ട ആഭ്യന്തരയുദ്ധ കാലത്ത് കടുത്ത മനുഷ്യാവകാശധ്വംസനം നടത്തിയെന്ന് ആരോപണമുള്ള ജനറലിനെ രാജ്യത്തെ പുതിയ സൈനികമേധാവിയായി നിയമിച്ചു. മേജര്‍ ജനറല്‍ ശാവേന്ദ്ര സില്‍വയെയാണ് പ്രസിഡന്റ് മൈത്രിപാല സിരിസേന സൈന്യാധിപനായി അവരോധിച്ചത്.
തമിഴ് പുലികളുമായുള്ള യുദ്ധത്തിന്റെ അവസാന ഘട്ടത്തില്‍ 58ാം ഡിവിഷന്‍ സേനാദളത്തിന്റെ മേധാവിയായിരുന്നു സില്‍വ. ഈ ഡിവിഷന്‍ സാധാരണക്കാരെയും ആശുപത്രികളെയും ലക്ഷ്യംവയ്ക്കുകയും മാനുഷികസഹായങ്ങള്‍ തടയുകയും ചെയ്‌തെന്നാണ് അന്താരാഷ്ട്ര മനുഷ്യാവകാശ സംഘടനകള്‍ ആരോപിച്ചത്. യു.എന്‍ കണക്കനുസരിച്ച് ഒരു ലക്ഷം പേര്‍ കൊല്ലപ്പെട്ട യുദ്ധത്തിന്റെ അവസാന മാസങ്ങളില്‍ 45,000 തമിഴരാണ് കൊല്ലപ്പെട്ടത്.