താമരശ്ശേരി: അഴിമതി ആരോപണം നേരിട്ട പുതുപ്പാടി പഞ്ചായത്ത് അംഗം പി.കെ ഷൈജല്‍ രാജിവച്ചു. പഞ്ചായത്ത് ഭരണസമിതിയില്‍ 12 അംഗങ്ങളുടെ ഭൂരിപക്ഷമുണ്ടായിട്ടും നിലവില്‍ പഞ്ചായത്ത് പ്രസിഡന്റ് സ്ഥാനം ഒന്‍പത് അംഗങ്ങളുള്ള യു.ഡി.എഫിനാണ്. എസ്.സി സംവരണ പ്രസിഡന്റ് പദവിയുള്ള പഞ്ചായത്തില്‍ എല്‍.ഡി.എഫില്‍നിന്ന് എസ്.സി വിഭാഗത്തില്‍പെട്ട ആരും വിജയിച്ചിരുന്നില്ല. ഇതേതുടര്‍ന്ന് യു.ഡി.എഫിലെ അംബിക മംഗലത്ത് പ്രസിഡന്റായി തെരഞ്ഞെടുക്കപ്പെട്ടു. ഇതു മറികടക്കാനാണ് സി.പി.എം അംഗം രാജിവച്ചത്. ഈ വാര്‍ഡില്‍ സംവരണ സമുദായ അംഗത്തെ മത്സരിപ്പിച്ച് പ്രസിഡന്റ് സ്ഥാനത്ത് എത്തിക്കാനാണു സി.പി.എം തീരുമാനം.
അതേസമയം മാസങ്ങള്‍ക്ക് മുന്‍പ് ഒന്നാം വാര്‍ഡില്‍ കുടുംബശ്രീ പ്രവര്‍ത്തകരെ ഉപയോഗിച്ച് കിണര്‍ നിര്‍മിച്ചുനല്‍കിയതുമായി ബന്ധപ്പെട്ട് വ്യാജരേഖകള്‍ ഉണ്ടാക്കിയെന്നും ഇവ ഉപയോഗിച്ച് കുടുംബശ്രീ ഫണ്ടില്‍നിന്ന് 9,804 രൂപ കൈക്കലാക്കിയെന്നും ഷൈജലിനെതിരേ ആരോപണമുയര്‍ന്നിരുന്നു.