കൊച്ചി: സംസ്ഥാനത്തെ നഴ്‌സുമാരുടെ സംഘടനയായ യു.എന്‍.എയില്‍ നടന്ന ഫണ്ട് തിരിമറി അന്വേഷിക്കാന്‍ പ്രത്യേക സംഘത്തെ നിയോഗിക്കണമെന്ന് ഹൈക്കോടതി ഉത്തരവിട്ടു. നിശ്ചിത സമയത്തിനുള്ളില്‍ കേസന്വേഷണം പൂര്‍ത്തിയാക്കണമെന്നും ഉത്തരവില്‍ പറഞ്ഞു. തങ്ങള്‍ക്കെതിരായുള്ള കേസ് റദ്ദാക്കണമെന്നാവശ്യപ്പെട്ട് യു.എന്‍.എ സംസ്ഥാന അധ്യക്ഷന്‍ ജാസ്മിന്‍ ഷാ, നേതാക്കളായ ഷോബി ജോസഫ്, പി.ഡി ജിത്തു എന്നിവര്‍ നല്‍കിയ ഹരജി പരിഗണിക്കുന്നതിനിടെയാണ് കോടതി പ്രസ്തുത നിര്‍ദേശം നല്‍കിയത്.

ജാസ്മിന്‍ ഷായെ എന്തുകൊണ്ട് ഇതുവരേ ചോദ്യം ചെയ്തില്ലെന്ന ഹൈക്കോടതിയുടെ ചോദ്യത്തിന് അയാള്‍ ഒളിവിലാണെന്നായിരുന്നു അന്വേഷണ ഉദ്യോഗസ്ഥന്റെ മറുപടി. അതേസമയം കൃത്യമായ കണക്കുകള്‍ കമ്മിറ്റിയില്‍ അവതരിപ്പിച്ചാണ് താന്‍ പ്രവര്‍ത്തിക്കുന്നതെന്നും യു.എന്‍.എയില്‍ അഴിമതി നടന്നെന്ന ആരോപണം തെറ്റാണെന്നും കോടതിയില്‍ ജാസ്മിന്‍ ഷാ വാദിച്ചു.

കേസിലെ കോടതിയുടെ ഇടപെടല്‍ സ്വാഗതാര്‍ഹമാണെന്ന് യു.എന്‍.എ മുന്‍ വൈസ് പ്രസിഡന്റും കേസിലെ പരാതിക്കാരനുമായ സിബി മുകേഷ് പറഞ്ഞു. നിലവില്‍ കേസ് അന്വേഷിക്കുന്ന സംഘത്തിന് മൊഴി നല്‍കാന്‍ പോലും ജാസ്മിന്‍ ഷായും സംഘവും തയ്യാറായിട്ടില്ല. ഇവരൊക്കെ ഒളിവിലാണെന്നാണ് സര്‍ക്കാര്‍ ഇന്ന് കോടതിയില്‍ പറഞ്ഞത്. ഇതൊന്നും കൂടാതെ ഫണ്ട് തിരിമറി നടത്തി എന്നാരോപിക്കുന്ന അതേ അക്കൗണ്ടില്‍ നിന്നും പണമെടുത്താണ് ജാസ്മിന്‍ ഷായും സംഘവും കേസ് നടത്തുന്നതെന്നും ഇക്കാര്യം തങ്ങള്‍ കോടതിയുടെ ശ്രദ്ധയില്‍പ്പെടുത്തുമെന്നും അദ്ദേഹം കൂട്ടിച്ചേര്‍ത്തു.