പൊന്നാനി :  കടലാക്രമണത്തില്‍ പൂര്‍ണ്ണമായും മണല്‍ മൂടിയ ജങ്കാര്‍ റോഡിലെ മണല്‍ പൂര്‍ണ്ണമായും നീക്കം ചെയ്തില്ല . ഇതോടെ നിരവധി ബൈക്ക് യാത്രികരാണ്  ദിവസവും അപകടത്തില്‍ പെടുന്നത്. നേരത്തേ ജങ്കാര്‍ റോഡിലെ മണല്‍ ജെ സി ബി ഉപയോഗിച്ച് നീക്കം ചെയ്തിരുന്നു . പക്ഷെ കടലാക്രമണത്തില്‍ വീണ്ടും മണല്‍ നിറയുകയും നേരത്തേ കൂട്ടിയിട്ട മണല്‍ വീണ്ടും റോഡിലേക്ക് ഇടിയുകയുമായിരുന്നു. ഇപ്പോള്‍ മണല്‍ മൂടിയ കാരണത്താല്‍ ബൈക്ക് യാത്രക്കാരാണ് അപകടത്തില്‍ പെടുന്നത്. ട്രോളിംഗ് നിരോധനം കഴിഞ്ഞതോടെ മല്‍സ്യവുമായി ഹാര്‍ബറിലെത്തുന്ന നിരവധി ബൈക്ക് യാത്രക്കാര്‍ ഇന്നലെ മണലില്‍ വീണിരുന്നു. മണലില്‍ കുരുങ്ങി വലിയ വാഹനങ്ങളും പോകാന്‍ കഴിയാത്ത സ്ഥിതിയാണ്. എത്രയും പെട്ടെന്ന് മണല്‍ പൂര്‍ണ്ണമായും നീക്കം ചെയ്യണമെന്ന് വിവിധ മല്‍സ്യത്തൊഴിലാളി സംഘടനകള്‍ ആവശ്യപ്പെട്ടു.