മുക്കം: പഞ്ചായത്ത് ഡയരക്ടറുടെ ശുപാര്‍ശ പ്രകാരം സംസ്ഥാനത്തെ ഗ്രാമപഞ്ചായത്ത് അസിസ്റ്റന്റ് സെക്രട്ടറിമാരുടെ ചുമതലകളും ഉത്തരവാദിത്തങ്ങളും സര്‍ക്കാര്‍ പുതുക്കി നിശ്ചയിച്ചു.
2013 ജൂലൈയിലാണ് സെക്രട്ടറിമാരുടെ പ്രവര്‍ത്തനഭാരം കുറക്കുക എന്ന ലക്ഷ്യത്തോടെ സംസ്ഥാനത്തെ സാമ്പത്തിക നില മെച്ചപ്പെട്ട 864 ഗ്രാമപഞ്ചായത്തുകളില്‍ ഓരോ അസിസ്റ്റന്റ് സെക്രട്ടറി തസ്തിക സൃഷ്ടിച്ചത്.
തൊഴിലുറപ്പ് പദ്ധതി നിര്‍വഹണ ഉദ്യോഗസ്ഥന്‍ അടക്കമുള്ള അപ്രധാന ചുമതലകളായിരുന്നു തുടക്കത്തില്‍ ഇവര്‍ക്ക് നല്‍കിയിരുന്നത്.
വിവിധ സാമൂഹിക സുരക്ഷാ പെന്‍ഷന്‍ അപേക്ഷകള്‍ സ്വീകരിക്കല്‍, അന്വേഷണ ഉദ്യോഗസ്ഥര്‍ക്ക് കൈമാറല്‍, അന്വേഷണാനുസരണം സ്റ്റാന്‍ഡിങ് കമ്മിറ്റിയുടെ ശുപാര്‍ശക്ക് സമര്‍പ്പിക്കല്‍, ഗ്രാമ പഞ്ചായത്ത് കമ്മിറ്റിയുടെ അംഗീകാരം വാങ്ങല്‍, തുക അനുവദിക്കുന്നതിന് ആവശ്യമായ പ്രവര്‍ത്തനങ്ങള്‍ നടത്തല്‍, വിധവകളുടെ പെണ്‍മക്കളുടെ വിവാഹ ധനസഹായം തുടങ്ങിയവ സംബന്ധിച്ച അപേക്ഷ സ്വീകരിക്കലും അനുബന്ധ തുടര്‍നടപടികളും, ദിവസവേതന അടിസ്ഥാനത്തിലുള്ള ജീവനക്കാര്‍, കരാര്‍ ജീവനക്കാര്‍ എന്നിവരുടെ നിയന്ത്രണാധികാരി എന്നീ ചുമതലകള്‍ കൂടി അസിസ്റ്റന്റ് സെക്രട്ടറിക്ക് നല്‍കിയിട്ടുണ്ട്.
കൂടാതെ പട്ടികജാതി- വര്‍ഗ പദ്ധതികളുടെ ഇംപ്ലിമെന്റിങ് ഓഫിസര്‍ ചുമതലയും അസി. സെക്രട്ടറിമാരാണ് വഹിക്കേണ്ടത്. എന്നാല്‍ കോടതികള്‍, കമ്മിഷനുകള്‍ എന്നിവയില്‍ ഗ്രാമപഞ്ചായത്ത് സെക്രട്ടറി നേരിട്ട് ഹാജരാകേണ്ടതിനാല്‍ വ്യവഹാരങ്ങളുടെ നടത്തിപ്പ് ചുമതലകളില്‍നിന്ന് ഇവരെ ഒഴിവാക്കിയിട്ടുണ്ട്.