നിലമ്പൂര്‍: സ്‌കൂളിലെ ചടങ്ങില്‍ പങ്കെടുത്ത് മടങ്ങുന്നതിനിടെ ആദിവാസി കുട്ടികള്‍ എം.എല്‍.എയെ വളഞ്ഞു. സര്‍ക്കാര്‍ നിര്‍ദ്ദേശിച്ച പാല്‍ സ്‌കുളില്‍ നല്‍കുന്നില്ലെന്നായിരുന്നു പി.വി അന്‍വര്‍ എം.എല്‍.എയോട് ഇവരുടെ പരാതി. വെളിയംതോട് പ്രാക്തന ഗോത്ര വിഭാഗങ്ങള്‍ക്കായുള്ള ഇന്ദിരാഗാന്ധി മോഡല്‍ റസിഡന്‍ഷ്യല്‍ സ്‌കൂളിലെ വിദ്യാര്‍ഥികളാണ് പരാതിയുമായി എത്തിയത്. ഉള്‍കാടുകളിലെ 525 കുട്ടികളാണ്  ഒന്നുമുതല്‍ പത്തുവരെ  ഇവിടെ താമസിച്ചു പഠിക്കുന്നത്. കിടക്കയോ തലയിണയോ നല്ലതില്ലെന്നും ഇവര്‍ പരാതിപ്പെട്ടു. പരാതി കേട്ട എം.എല്‍.എ ഇന്നുമുതല്‍ പാലും മുട്ടയും നല്‍കാന്‍ സ്‌കൂള്‍ അധികൃതരോട് ആവശ്യപ്പെട്ടു. പാല്‍ നല്‍കാത്തതില്‍ സ്‌കൂള്‍ അധികൃതരോട് വിശദീകരണവും ആവശ്യപ്പെട്ടിട്ടുണ്ട്.