വാഷിങ്ടണ്‍: 500 കി.മീ ദൂരപരിധിയുള്ള ഉപരിതല ക്രൂയിസ് മിസൈല്‍ യു.എസ് പരീക്ഷിച്ചതായി പെന്റഗണ്‍ വെളിപ്പെടുത്തി. ഞായറാഴ്ച സാന്‍ നിക്കോളാസ് ദ്വീപില്‍ നിന്ന് വിക്ഷേപിച്ച മിസൈല്‍ വിജയകരമായി 500 കി.മീ ദൂരെയുള്ള ലക്ഷ്യത്തില്‍ പതിച്ചു. മധ്യദൂര ആണവ മിസൈലുകള്‍ വികസിപ്പിക്കുന്നത് തടയുന്ന ഐ.എന്‍.എഫ് കരാറില്‍ നിന്ന് പിന്‍മാറിയ ശേഷം യു.എസ് നടത്തുന്ന ആദ്യ മിസൈല്‍ പരീക്ഷണമാണിത്.
കരാര്‍ റഷ്യ ലംഘിച്ചെന്നാരോപിച്ചാണ് ഈമാസം രണ്ടിന് റഷ്യയുമായി സോവിയറ്റ് കാലത്തുണ്ടാക്കിയ ആണവ നിര്‍വ്യാപന കരാറില്‍ നിന്ന് ട്രംപ് പിന്മാറിയത്. എന്നാല്‍ ആരോപണം നിഷേധിച്ച റഷ്യയും അതോടെ കരാറില്‍ നിന്ന് ഒഴിവായി. 1987ല്‍ യു.എസ് പ്രസിഡന്റ് റൊണാള്‍ഡ് റീഗനും സോവിയറ്റ് യൂനിയന്‍ നേതാവ് മിഖായേല്‍ ഗോര്‍ബച്ചേവും ഒപ്പുവച്ച കരാര്‍ പ്രകാരം ഇരു വന്‍ശക്തി രാജ്യങ്ങളും 500-5,500 കി.മീ ദൂരപരിധിയുള്ള മിസൈലുകള്‍ പരീക്ഷിക്കുന്നത് നിര്‍ത്തിയിരുന്നു.
അതേസമയം റഷ്യയും ചൈനയും യു.എസ് നിലപാടിനെതിരേ പരസ്യമായി രംഗത്തുവന്നു. സംഘര്‍ഷാന്തരീക്ഷം രൂപപ്പെടാനേ ഇതുപകരിക്കൂവെന്നും വ്യക്തമാക്കിയ റഷ്യന്‍ ഉപ വിദേശകാര്യമന്ത്രി പ്രകോപനത്തോട് റഷ്യ പ്രതികരിക്കുന്നില്ലെന്നു പറഞ്ഞു. ഇത് പുതിയ ആയുധപ്പന്തയത്തിന് തുടക്കമിടുമെന്ന് ചൈന പ്രതികരിച്ചു.