സൂറിച്: 2023 വനിതാ ഫുട്‌ബോള്‍ ലോകകപ്പിന് ആതിഥേയത്വം വഹിക്കാന്‍ സന്നദ്ധത പ്രകടിപ്പിച്ച് ബെല്‍ജിയം.
ബെല്‍ജിയത്തിന് പുറമെ ഒന്‍പത് രാജ്യങ്ങളും ലേകകപ്പിന് ആതിഥേയത്വം വഹിക്കുന്നതിനുള്ള സന്നദ്ധത അറിയിച്ചിട്ടുണ്ട്.
2023 ഫുട്‌ബോള്‍ ലോകകപ്പില്‍ മത്സരിക്കുന്ന രാജ്യങ്ങളുടെ എണ്ണം 24ല്‍ നിന്ന് 32 ആക്കി ഉയര്‍ത്തുമെന്ന് ഫിഫ മുന്‍പേ പ്രഖ്യാപിച്ചിരുന്നു.
ഈവര്‍ഷം ഫ്രാന്‍സില്‍ നടന്ന വനിതാ ലോകകപ്പിനു ശേഷമാണ് കൂടുതല്‍ രാജ്യങ്ങളെ ടൂര്‍ണമെന്റില്‍ ഉള്‍പ്പെടുത്തുമെന്ന് ഫിഫ പ്രസിഡന്റ് ഇന്‍ഫീന്റീഞ്ഞോ വ്യക്തമാക്കിയത്.
മത്സരത്തിനായി ആതിഥേയത്വം വഹിക്കാനുള്ള നറുക്കെടുപ്പില്‍ ബെല്‍ജിയവും പങ്കാളിയാകുന്നത് സ്വാഗതം ചെയ്യുന്നതായും ഫിഫ വ്യക്തമാക്കി.
ബെല്‍ജിയത്തിന് പുറമെ അര്‍ജന്റീന, ആസ്‌ത്രേലിയ, ബൊളീവിയ, ബ്രസീല്‍, കൊളംബിയ, ജപ്പാന്‍, ന്യൂസിലന്‍ഡ്, ദക്ഷിണാഫ്രിക്ക എന്നിവരെ കൂടാതെ ദക്ഷിണകൊറിയയും ഉത്തരകൊറിയയും സംയുക്തമായും സന്നദ്ധരായി രംഗത്തുണ്ട്.
സെപ്റ്റംബര്‍ രണ്ടിനുള്ളില്‍ പത്ത് രാജ്യങ്ങളും നറുക്കെടുപ്പില്‍ പങ്കെടുക്കുന്നത് സംബന്ധിച്ച് വ്യക്തത നല്‍കണം. അടുത്ത വര്‍ഷം മെയ് മാസത്തോടെ ആതിഥേയര്‍ ആരെന്ന് അറിയും.