വാഷിങ്ടണ്‍: അമേരിക്കയിലെ കോള്‍ സെന്റര്‍ തട്ടിപ്പ് കേസില്‍ നാല് ഇന്ത്യക്കാരും ഒരു പാക് പൗരനും കുറ്റക്കാരെന്ന് യു.എസ് സ്റ്റേറ്റ് ഡിപ്പാര്‍ട്ട്‌മെന്റ് ജസ്റ്റിസ്. രാജുഭായ് പട്ടേല്‍(32), വിരാജ് പട്ടേല്‍(33), ദിലീപ് കുമാര്‍ അംബല്‍ പട്ടേല്‍(53), ഹാര്‍ദിക് പട്ടേല്‍(31) എന്നിവരാണ് പ്രതികളായ ഇന്ത്യക്കാര്‍. ഹാര്‍ദിക് പട്ടേലിനെ ഗൂഢാലോചന നടത്തിയതിന് നേരത്തെ കുറ്റക്കാരനാണെന്ന് കണ്ടെത്തിയിരുന്നു.
25 കാരനായ ഫഹദ് അലിയാണ് പിടിയിലായ പാകിസ്താന്‍കാരന്‍. ടെക്‌സസിലെ ജില്ലാ കോടതി ജഡ്ജ് ഡേവിഡ് ഹിറ്റ്‌നര്‍ ആണ് വിധി പ്രസ്താവിച്ചത്.
സാമ്പത്തിക തിരിമറിയാണ് ഇവര്‍ക്കെതിരായ കുറ്റം. ശിക്ഷ പിന്നീട് വിധിക്കും. മഹാരാഷ്ട്ര, ഡല്‍ഹി, ഗുജറാത്ത് എന്നിവിടങ്ങളില്‍ നിന്നുള്ള അംഗീകാരമില്ലാത്ത കോള്‍ സെന്ററുകളിലെ ജീവനക്കാര്‍ ആദായനികുതി വകുപ്പില്‍ നിന്നാണെന്ന് തെറ്റിദ്ധരിപ്പിച്ച് അമേരിക്കക്കാരില്‍ നിന്നും കോടികള്‍ തട്ടിയെടുത്തെന്നാണ് കേസ്.
രജിസ്റ്റര്‍ ചെയ്യാത്ത കോള്‍സെന്ററുകള്‍ വഴി ദിവസവും ഒരു കോടി മുതല്‍ ഒന്നരക്കോടി വരെ ഇത്തരത്തിലുള്ള തട്ടിപ്പിലൂടെ ഇവര്‍ നേടിയതായി യു.എസ് നടത്തിയ അന്വേഷണത്തില്‍ കണ്ടെത്തി. 15,000 മുതല്‍ 70,000 വരെയായിരുന്നു ജീവനക്കാരുടെ ശമ്പളം. കൂടുതല്‍ പണം തട്ടിയെടുക്കുന്നവര്‍ക്ക് പ്രത്യേക സമ്മാനങ്ങളും കമ്പനി നല്‍കിയിരുന്നു.
2012 ഓഗസ്റ്റ് മുതലാണ് പ്രതികള്‍ തട്ടിപ്പ് ആരംഭിച്ചത്. ഹാര്‍ദിക് പട്ടേല്‍ ആണ് ഇത്തരത്തില്‍ കോള്‍ സെന്ററുകള്‍ നടത്തിയിരുന്നത്. പിന്നീട് ഇയാള്‍ അമേരിക്കയില്‍ എത്തുകയായിരുന്നു.