മ്യൂണിക്ക്: ബൊറൂസിയ ഡോര്‍ട്മുണ്ടിനെ ഇനി പീറ്റര്‍ ബോസ് പരിശീലിപ്പിക്കും. മുന്‍ അയാക്‌സ് പരിശീലകനാണ് ബോസ്. സീസണില്‍ ക്ലബിന്റെ പ്രകടനം മോശമായതിനെ തുടര്‍ന്ന് ഡോര്‍ട്മുണ്ട് പരിശീലകന്‍ തോമസ് ടുച്ചലിനെ ക്ലബ് പുറത്താക്കിയിരുന്നു. ഈ സ്ഥാനത്തേക്കാണ് ബോസ് വരുന്നത്.
രണ്ടു വര്‍ഷത്തേക്കാണ് കരാര്‍. ഈ വര്‍ഷം അയാക്‌സിന്റെ പരിശീലക സ്ഥാനം ഏറ്റെടുത്ത ബോസ് ടീമിനെ ഡച്ച് ലീഗില്‍ രണ്ടാമത്തെത്തിക്കാനും യൂറോപ്പ ലീഗില്‍ റണ്ണറപ്പാക്കാനും സാധിച്ചിരുന്നു. എന്നാല്‍ ക്ലബില്‍ തുടരാന്‍ ആഗ്രഹമില്ലെന്ന് ബോസ് വ്യക്തമാക്കിയിരുന്നു. അതേസമയം കളിക്കാരുമായുള്ള ബന്ധം വഷളായതിനെ തുടര്‍ന്നാണ് ടുച്ചലിനെ ക്ലബ് പുറത്താക്കിയത്. നേരത്തെ നീസിന്റെ കോച്ച് ലൂസിയന്‍ ഫാവ്‌റെ ഡോര്‍ട്മുണ്ടിനെ പരിശീലിപ്പിക്കാനെത്തുമെന്നായിരുന്നു അഭ്യൂഹം. എന്നാല്‍ താല്‍പര്യമില്ലെന്ന് അദ്ദേഹം ജര്‍മന്‍ ക്ലബിനെ അറിയിക്കുകയായിരുന്നു.