പരപ്പനങ്ങാടി: തെരുവുനായശല്യം പെരുകിയത് കാല്‍നട യാത്രക്കാര്‍ക്കും വളര്‍ത്തു മൃഗങ്ങള്‍ക്കും ഭീഷണിയായി. കോഴികളെയും കൊന്നൊടുക്കുന്നുണ്ട്. കൂട്ടമായെത്തുന്ന നായകള്‍ പകല്‍ സമയത്ത് വീട്ടുമുറ്റത്ത്  കെട്ടിയിടുന്ന ആടുകളെയും ആക്രമിക്കുകയാണ്. കഴിഞ്ഞ വര്‍ഷം ഈ പ്രദേശത്തെ ആടുകളെ തെരുവുനായ്ക്കള്‍ ആക്രമിച്ച് കൊന്നിട്ടുണ്ട്. വഴിയാത്രക്കാര്‍ക്കും തെരുവുനായകള്‍ ഭീഷണി ഉയര്‍ത്തുകയാണ്. രാത്രികാല മദ്‌റസാ വിദ്യാര്‍ഥികള്‍ നായ ശല്യം കാരണം ഭീതിയിലാണ്. നായകള്‍ വീടുകളിലെ കൊലായിലും മറ്റും കയറി ചവിട്ടികളും ചെരുപ്പുകളും കടിച്ചുകീറി നശിപ്പിക്കുന്നുണ്ട്. രാത്രിയില്‍ വീടുകളില്‍ നിന്ന് പുറത്തിറങ്ങാന്‍ പറ്റാത്ത അവസ്ഥയിലാണ് വീട്ടുകാര്‍.  തെരുവുകളില്‍ മാംസ മാലിന്യങ്ങള്‍  അലക്ഷ്യമായി വലിച്ചെറിയുന്നത് കാരണമാണ്   തെരുവുനായ ശല്യം വര്‍ധിക്കുന്നത്.