തിരുവനന്തപുരം: പിണറായി സര്‍ക്കാരിനെതിരേ പരസ്യ വിമര്‍ശനവുമായി ജനതാദള്‍ (എസ്) ദേശീയ ജനറല്‍ സെക്രട്ടറി നീലലോഹിതദാസന്‍ നാടാര്‍. എയ്ഡഡ് മേഖലയിലെ സംവരണവുമായി ബന്ധപ്പെട്ട സര്‍ക്കാര്‍ നിലപാടിനെതിരേയാണ് നീലലോഹിതദാസന്‍ രംഗത്തെത്തിയത്. മാനേജ്‌മെന്റുകളെ സഹായിക്കുന്ന നിലപാടാണ് സര്‍ക്കാരിന്റേതെന്നും, ഇടത് സര്‍ക്കാരില്‍ നിന്ന് ഇതല്ല ജനം പ്രതീക്ഷിക്കുന്നതെന്നും അദ്ദേഹം പറഞ്ഞു. എയ്ഡഡ് സെക്ടര്‍ സംരക്ഷണ സമിതിയുടെ ആഭിമുഖ്യത്തില്‍ നടത്തുന്ന 24 മണിക്കൂര്‍ സെക്രട്ടേറിയറ്റ് ഉപവാസ സമരം ഉദ്ഘാടനം ചെയ്യുകയായിരുന്നു അദ്ദേഹം.
ലോക്‌സഭാ തെരഞ്ഞെടുപ്പ് പരാജയം വിലയിരുത്തി തെറ്റുകള്‍ തിരുത്താന്‍ ശ്രമിക്കുമ്പോള്‍ കൂടുതല്‍ തെറ്റുകളിലേക്ക് സര്‍ക്കാര്‍ വീണുപോകരുത്. എയ്ഡഡ് സ്‌കൂള്‍ നിയമങ്ങളില്‍ സംവരണം പാലിക്കണമെന്നും പി.എസ്.സിക്ക് നിയമനം വിടണമെന്നും ആവശ്യപ്പെട്ട് നല്‍കിയ ഹര്‍ജിയില്‍ സര്‍ക്കാര്‍ നല്‍കിയ സത്യവാങ്മൂലം മാനേജ്‌മെന്റുകളെ സംരക്ഷിക്കുന്ന വിധത്തിലുള്ളതാണ്. ഒഴുക്കന്‍ മട്ടിലുള്ള ഇത്തരം നടപടികളല്ല പിണറായി സര്‍ക്കാരില്‍ നിന്നും ജനങ്ങള്‍ പ്രതീക്ഷിക്കുന്നതെന്നും അദ്ദേഹം പറഞ്ഞു.