കുന്ദമംഗലം: കുന്ദമംഗലം പഞ്ചായത്തില്‍ വിവിധ കടകളില്‍ പരിശോധന നടത്തിയതില്‍ നിരോധിച്ച 35 കിലോ പ്ലാസ്റ്റിക് ക്യാരി ബാഗുകള്‍ പിടികൂടി. വിവിധ കടകളില്‍ നിന്നായി പതിനായിരം രൂപയും ഈടാക്കി. കഴിഞ്ഞ ജൂണ്‍ അഞ്ച് മുതലാണ് പഞ്ചായത്തില്‍ പ്ലാസ്റ്റിക് ക്യാരി ബാഗുകള്‍ക്ക് പൂര്‍ണ്ണ നിരോധനം ഏര്‍പ്പെടുത്തിയത്. പഞ്ചായത്ത് പ്രസിഡന്റ് ഷൈജ വളപ്പില്‍, വൈസ് പ്രസിഡന്റ് കെ.പി കോയ, ആരോഗ്യ വിദ്യാഭ്യാസ ചെയര്‍ പേഴ്‌സണ്‍ ടി.കെ സൗദ പഞ്ചായത്ത് ജീവനക്കാരായ അഷ്‌റഫ്, അനസ്, ജൂനിയര്‍ ഹെല്‍ത്ത് ഇന്‍സ്‌പെക്ടര്‍മാരായ സനല്‍, സജിത്ത് എന്നിവരാണ് പരിശോധന നടത്തിയത്. പരിശോധനയില്‍ കടകളില്‍ നിരോധിച്ച ക്യാരി ബാഗുകള്‍ വ്യാപകമായി ഉപയോഗിക്കുന്നത് കണ്ടെത്തി. വരും ദിവസങ്ങളിലും പരിശോധന ശക്തമാക്കുമെന്ന് ആരോഗ്യ വിദ്യഭ്യാസ ചെയര്‍ പേഴ്‌സണ്‍ ടി.കെ സൗദ പറഞ്ഞു. പൂര്‍ണ നിരോധനം ഏര്‍പ്പെടുത്തിയപ്പോള്‍ കച്ചവടക്കാര്‍ പ്ലാസ്റ്റിക് കവര്‍ ഉപേക്ഷിച്ച് തുണി സഞ്ചികള്‍ വിതരണം ചെയ്‌തെങ്കിലും തുടര്‍ നടപടിയൊന്നും ഇല്ലാതായതോടെ എല്ലാ കച്ചവടക്കാരും പ്ലാസ്റ്റിക് ക്യാരി ബാഗുകള്‍ തന്നെ ഉപയോഗിക്കാന്‍ തുടങ്ങുകയായിരുന്നു.