ന്യൂഡല്‍ഹി: എന്‍.ഡി ടി.വി ഉടമകളായ പ്രണോയ് റോയ്, ഭാര്യ രാധികാ റോയ് ഉള്‍പ്പെടെയുള്ളവര്‍ക്കെതിരേ സി.ബി.ഐ കേസ്. നേരിട്ടുള്ള വിദേശ നിക്ഷേപ ചട്ടങ്ങള്‍ ലംഘിച്ചെന്ന് ആരോപിച്ച് അഴിമതി തടയല്‍ നിയമപ്രകാരമാണ് സി.ബി.ഐയുടെ നടപടി. റോയ് ദമ്പതികള്‍ക്ക് പുറമെ ചാനലിന്റെ മുന്‍ സി.ഇ.ഒ വിക്രമാദിത്യ ചന്ദ്രയ്ക്കും മറ്റു ചില ആദായനികുതി വകുപ്പ് ഉദ്യോഗസ്ഥര്‍ക്കെതിരേയും കേസുണ്ട്. കുറ്റകരമായ ഗൂഢാലോചന, വഞ്ചന, അഴിമതി തുടങ്ങിയ കുറ്റങ്ങള്‍ ചുമത്തിയാണ് വിക്രമാദിത്യനെതിരേ കേസെടുത്തിരിക്കുന്നത്. 2004 മുതല്‍ 2010 വരെ നികുതി ഇളവുള്ള നെതര്‍ലന്‍ഡ്‌സ്, ബ്രിട്ടണ്‍, ദുബൈ, മലേഷ്യ, മൗറീഷ്യസ് തുടങ്ങിയ രാജ്യങ്ങളില്‍ 32 കമ്പനികള്‍ എന്‍.ഡി.ടി.വി സ്ഥാപിച്ചെന്നും വിദേശത്തു നിന്നും പണം എത്തിക്കാനായി മാത്രം രൂപീകരിച്ച കടലാസ് കമ്പനികളാണ് ഇവയെന്നും എഫ്.ഐ.ആറില്‍ ചൂണ്ടിക്കാട്ടുന്നു.
നേരിട്ടുള്ള വിദേശനിക്ഷേപം സ്വീകരിക്കുന്നത് സംബന്ധിച്ച ചട്ടലംഘനം നടത്തിയതായി ആരോപിച്ച് പ്രണോയ് റോയിയെയും രാധിക റോയിയെയും കഴിഞ്ഞയാഴ്ച എന്‍ഫോഴ്‌സ്‌മെന്റ് ഡയറക്ടറേറ്റ് മുംബൈ വിമാനത്താവളത്തില്‍ തടഞ്ഞുവയ്ക്കുകയും വിദേശയാത്രക്കു നിരോധനമേര്‍പ്പെടുത്തുകയും ചെയ്യുകയുണ്ടായി. സ്വകാര്യ ബാങ്കിന് വന്‍ നഷ്ടം വരുത്തിയെന്ന് ആരോപിച്ച് 2017ലും പ്രണോയ് റോയ്ക്കും രാധിക റോയ്ക്കുമെതിരേ കേസെടുത്തിരുന്നു. ഇതുനിലനില്‍ക്കെയാണ് പുതിയ കേസ്.
അതേസമയം ആരോപണങ്ങളെ ചാനല്‍ നിഷേധിച്ചു. യാതൊരു തെളിവുമില്ലാതെ അടിസ്ഥാനരഹിതമായ ആരോപണങ്ങളുടെ പേരിലുള്ളതാണ് കേസെന്ന് എന്‍.ഡി.ടി.വി ചൂണ്ടിക്കാട്ടി. അന്വേഷണത്തിന്റെ എല്ലാ ഘട്ടത്തിലും കേസുമായി പ്രണോയിയും രാധികയും സഹകരിച്ചിട്ടുണ്ട്. എല്ലാ നിയമ നടപടിക്രമങ്ങളും പാലിച്ചുള്ള നിക്ഷേപമാണ് ചാനല്‍ നടത്തിയത്. ഇന്ത്യയിലെ ജുഡീഷ്യറിയില്‍ വിശ്വാസമുണ്ട്. ഒരിക്കലും സ്വതന്ത്ര മാധ്യമപ്രവര്‍ത്തനത്തോടുള്ള പ്രതിബദ്ധതയില്‍ നിന്ന് ചാനല്‍ പിന്നോട്ടുപോവില്ലെന്നും ചാനല്‍ പ്രസ്താവനയില്‍ വിശദീകരിച്ചു.