കൊളത്തൂര്‍: അനധികൃത മണല്‍കടത്തിനു വേണ്ടി ഉപയോഗിച്ചിരുന്ന രണ്ട് ടിപ്പര്‍ ലോറികള്‍ കൊളത്തൂര്‍ പൊലിസ് പിടികൂടി. ഇന്നലെ പുലര്‍ച്ചയോടെ മൂര്‍ക്കനാട് പള്ളിക്കടവില്‍ നിന്നും ഉച്ചയോടെ  ചെമ്മല കടവില്‍ നിന്നുമാണ് ഒരോ മണല്‍ ലോറികള്‍ പിടികൂടിയത്.  എന്നാല്‍ വാഹനത്തിലുണ്ടായിരുന്നവര്‍  ഓടി രക്ഷപ്പെട്ടു. വാഹനത്തില്‍ നിന്നും രേഖകള്‍ കണ്ടെടുത്തിട്ടുണ്ട്. മുമ്പും ഇത്തരത്തില്‍ മണല്‍ക്കടത്തു കേസുകളില്‍ പ്രതിയായിട്ടുള്ളവര്‍ തന്നെയാണു കുറ്റകൃത്യത്തിനു പിന്നിലെന്നു  പൊലിസ് പറഞ്ഞു. അഡീ:എസ്.ഐ രവീന്ദ്രന്‍, എസ്.സി.പി.ഒ രാമദാസ്, സി.പി.ഒമാരായ  വിനോദ്, ബൈജു, ഹോം ഗാര്‍ഡ് ജാഫര്‍ തുടങ്ങിയവരാണ് പൊലിസ് സംഘത്തിലുണ്ടായിരുന്നത്.