കയ്പമംഗലം(തൃശൂര്‍): ബി.ഡി.ജെ.എസ് നേതാവ് തുഷാര്‍ വെള്ളാപ്പള്ളിയുടെ അറസ്റ്റുമായി ബന്ധപ്പെട്ട് പരാതിക്കാരന്റെ വീട്ടില്‍ പൊലിസെത്തി അന്വേഷണം നടത്തി. മതിലകം പുതിയകാവ് സ്വദേശി നമ്പിപ്പുന്നിലത്ത് നാസില്‍ അബ്ദുല്ലയുടെ വീട്ടിലെത്തിയാണ് മതിലകം പൊലിസ് അന്വേഷണം നടത്തിയത്. അറസ്റ്റിലായത് പ്രമുഖ നേതാവായതിനാല്‍ പരാതിക്കാരന്റെ വീടിനോ ബന്ധുക്കള്‍ക്കോ ഏതെങ്കിലും തരത്തിലുള്ള ഭീഷണിയുണ്ടോ എന്നറിയാനായിരുന്നു അന്വേഷണമെന്നാണ് പൊലിസ് വിശദീകരണം.
ഇന്നലെ ഉച്ചയ്ക്ക് ഒന്നോടെയാണ് പുതിയകാവ് പള്ളിക്കടുത്തുള്ള നാസിലിന്റെ വീട്ടില്‍ മതിലകം അഡിഷണല്‍ എസ്.ഐ സൂരജിന്റെ നേതൃത്വത്തിലുള്ള സംഘവും രഹസ്യാന്വേഷണ വിഭാഗവുമെത്തിയത്. നാസിലിന്റെ ഉപ്പയും ഉമ്മയും ബന്ധുക്കളുമായിരുന്നു വീട്ടിലുണ്ടായിരുന്നത്. നാസില്‍ 2007 മുതല്‍ വിദേശത്താണ്, മൂന്ന് വര്‍ഷം മുന്‍പാണ് അവസാനമായി നാട്ടില്‍ വന്ന് മടങ്ങിയത്.